सोलुदुधकुण्ड–१० टाप्टिङको नयाँ प्रशासनिक भवन उद्घाटन

पौष ४, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर १० टाप्टिङको नयाँ प्रशासनिक भवन शुक्रबार उद्घाटन गरिएको छ । भवनको उद्घाटन जिल्ला समन्वय समितिका प्रमुख कृष्ण प्रसाद निरौलाले गर्नुभएको हो । वडा अध्यक्ष होम बहादुर मगरका अनुसार ग्रीनतारा कन्स्ट्रक्सन कम्पनी प्रा. लि.द्वारा निर्माण गरिएको उक्त भवनका लागि ठेक्का सम्झौता २०८१ साल साउन १९ गते सम्पन्न भएको थियो भने निर्माण कार्य २०८२ साल जेठ ३० गते सम्पन्न भएको हो ।

भवन निर्माणमा भ्याटसहित १ करोड १४ लाख ३० हजार ७ सय ५६ रुपैयाँ ८६ पैसा खर्च भएको छ । यसका लागि आवश्यक बजेट जिल्ला समन्वय समिति सोलुखुम्बु र सोलुदुधकुण्ड नगरपालिकाबाट विनियोजन गरिएको थियो । उद्घाटन कार्यक्रममा जिल्ला समन्वय समितिका प्रमुख निरौलाले जिल्लाका स्थानीय तहहरूको भौतिक पूर्वाधार विकासमा आफू सकारात्मक रहेको बताउनुभयो । यस्तै, सोलुदुधकुण्ड नगरपालिकाका मेयर नाम्गेल जाङ्बु शेर्पाले नयाँ भवन सञ्चालनमा आएसँगै वडा कार्यालयबाट नागरिकलाई थप व्यवस्थित र प्रभावकारी सेवा प्रवाह हुने विश्वास व्यक्त गर्नुभयो ।

कार्यक्रममा सोलुदुधकुण्ड नगरपालिकाकी उपमेयर गान्धिमाया तामाङ, नगर प्रवक्ता फूर्वा ग्याल्जेन शेर्पा, वडा नम्बर ८ का वडा अध्यक्ष पासाङ कट्वाल लगायत विभिन्न संघ–संस्थाका प्रतिनिधि, कर्मचारी तथा स्थानीयवासीहरूको उपस्थिति रहेको थियो । नयाँ प्रशासनिक भवन उद्घाटनसँगै नागरिकहरुलाई राष्ट्रिय परिचयपत्र वितरणसमेत गरिएको छ । सेवाग्राहीलाई सहज र प्रभावकारी सेवा प्रवाह गर्ने उद्देश्यले निर्माण गरिएको यस भवनबाट वडा सेवा अझ सुदृढ र व्यवस्थित हुने अपेक्षा गरिएको छ ।