जालिम पोखरी–मन्दिर परिसर संरक्षणका लागि १ हजार ५ सय मिटर घेराबार निर्माण हुने

पौष ४, सोलुखुम्बु । सोलुखुम्बुको थुलुङ दुधकोशी गाउँपालिका–७ मा रहेको जिल्लाकै प्रसिद्ध धार्मिक स्थल जालिम पोखरी, मन्दिर परिसर संरक्षणका लागि १ हजार ५ सय मिटर क्षेत्रफलमा घेराबार निर्माण गरिने भएको छ । शुक्रबार घेराबार निर्माणका लागि स्थलगत निरीक्षण तथा स्टामेटको तयारी गरिएको थुलुङ दुधकोशी गाउँपालिकाका प्रवक्ता भोजराज कार्कीले जानकारी दिनुभयो ।

यस वर्षदेखि जालिम पोखरी संरक्षण आयोजनालाई गाउँपालिकाको गौरवको आयोजनामा समावेश गरिएको छ । आयोजनाअन्तर्गत वडा नम्बर ७ बाट ५ लाख रुपैयाँ र गाउँपालिकाबाट २० लाख रुपैयाँ गरी जम्मा २५ लाख रुपैयाँको लागतमा घेराबारसहितको संरचना यसै वर्ष निर्माण गरिनेछ। जालिम मन्दिर थुलुङ दुधकोशी गाउँपालिका–७ मा करिब ६ हजार ५ सय फिट उचाइमा अवस्थित छ ।

यहाँ रहेको १२ महिना पानी नसुक्ने पोखरी ‘जालिम पोखरी’का नामले परिचित छ । पोखरीलाई स्थानीयवासीहरूले चारैतिर पर्खाल लगाएर संरक्षण गर्दै आएका छन् । वरिपरि हरियाली जङ्गलले घेरिएको यो स्थल धार्मिक तथा प्राकृतिक दृष्टिले महत्वपूर्ण मानिन्छ । जालिम पोखरीमा वर्षमा दुई पटक मेला लाग्ने परम्परा रहेको छ । ऋषितर्पणी चतुर्दशीदेखि पूर्णिमासम्म र चण्डी चतुर्दशीदेखि पूर्णिमासम्म मेला लाग्ने गर्दछ । मेलाका अवसरमा टाढा–टाढाबाट तीर्थयात्रीहरू आउने गरेका छन् भने विजुवा, धामी–झाँक्री तथा रुद्री लगाउने भक्तजनहरूको समेत उल्लेख्य उपस्थिति रहने गर्दछ । घेराबार निर्माणपछि धार्मिक स्थलको संरक्षणसँगै व्यवस्थापनमा सुधार आउने स्थानीयवासीहरूले अपेक्षा गरेका छन् ।