सोलुमा निर्वाचन प्रहरीलाई प्रमाणपत्र वितरण तथा विदाई

फागुन २८, सोलुखुम्बु । प्रतिनिधि सभा निर्वाचन २०८२ को सुरक्षार्थ जिल्ला प्रहरी कार्यालय सोलुखुम्बुमा खटिई निर्वाचन सम्पन्न गराएका निर्वाचन प्रहरीहरूलाई प्रमाणपत्र वितरण तथा विदाई गरिएको छ । जिल्ला प्रहरी कार्यालय सोलुखुम्बुमा बिहीबार आयोजित कार्यक्रममा कार्यालय प्रमुख प्रहरी नायव उपरीक्षक मनोजित कुँवरको आतिथ्यतामा निर्वाचन प्रहरीहरूलाई प्रमाणपत्र वितरण गरिएको हो ।

कार्यक्रममा प्रमुख अतिथि कुँवरले निर्वाचन प्रहरीहरूलाई प्रमाणपत्र प्रदान गर्दै सोलुखुम्बु जिल्लामा शान्तिपूर्ण रूपमा निर्वाचन सम्पन्न गराउन महत्वपूर्ण भूमिका खेलेकोमा धन्यवाद व्यक्त गर्नुभयो । छोटो समयको प्रशिक्षणका बाबजुद पनि निर्वाचन प्रहरीहरूले उत्कृष्ट कार्य सम्पादन गरेको भन्दै उहाँले प्रशंसा गर्नुभयो ।

उहाँले अब वर्दीविहीन नागरिक जीवनमा फर्किएपछि पनि समाजका विभिन्न क्षेत्रमा सकारात्मक भूमिका निर्वाह गर्ने विश्वास व्यक्त गर्नुभएको थियो । कार्यक्रममा प्रहरी अधिकृतहरू तथा अन्य प्रहरी कर्मचारीहरूको उपस्थिति रहेको थियो ।