प्रकाश सिंह कार्कीद्वारा ३२ लाखभन्दा बढीको चुनावी खर्च सार्वजनिक

फागुन २९, सोलुखुम्बु । हिमाली जिल्ला सोलुखुम्बु जिल्लाबाट प्रतिनिधिसभा सदस्यमा विजयी प्रकाश सिंह कार्की ले आफ्नो चुनावी खर्च विवरण सार्वजनिक गर्नुभएको छ । निर्वाचन प्रतिनिधिमार्फत जिल्ला निर्वाचन कार्यालयमा पेश गरिएको विवरणअनुसार कार्कीले चुनाव अभियानका क्रममा कुल ३२ लाख ८८ हजार ९ सय रुपैयाँ खर्च भएको उल्लेख गर्नुभएको छ ।

नेपाली कांग्रेस का उम्मेदवार कार्कीले पेश गरेको विवरणमा विभिन्न शीर्षकमा गरिएको खर्च समेटिएको छ । विवरणअनुसार सबैभन्दा बढी रकम सम्पर्क कार्यालय सञ्चालन र प्रचार–प्रसार सामग्री मा खर्च गरिएको उल्लेख छ । विवरण अनुसार ८ वटै पालिकामा सम्पर्क कार्यालय सञ्चालनका लागि ८ लाख रुपैयाँ र मुख्य सम्पर्क कार्यालय सञ्चालन (भोजन र आवाससहित) का लागि ८ लाख ४५ हजार ९ सय रुपैयाँ खर्च भएको छ ।

यसैगरी, प्रचार प्रसार सामग्रीमा ४ लाख ३६ हजार २५० रुपैयाँ, इन्धन खर्चमा २ लाख ४५ हजार ९५० रुपैयाँ र यातायात खर्चमा ३ लाख ५० हजार रुपैयाँ खर्च भएको कार्कीले जनाउनुभएको छ । अन्य खर्चहरूमा मतदाता नामावली खरिदमा ३ हजार, सूचना तथा सञ्चारमा ४ लाख तथा छपाइमा १ लाख ४२ हजार, मनोनयन दर्तामा १० हजार र विविध शीर्षकमा ५५ हजार रुपैयाँ खर्च भएको विवरणमा उल्लेख छ ।

उहाँ फागुन २१ मा सम्पन्न निर्वाचनमा १३ हजार १६६ मत प्राप्त गरी विजयी हुनुभएको थियो । उक्त खर्च विवरण प्रतिनिधि सभा सदस्य निर्वाचन ऐन, २०७४ को दफा ७२ तथा निर्वाचन आचारसंहिताबमोजिम जिल्ला निर्वाचन कार्यालयमा पेश गरिएको हो ।