एक लाख पुरस्कार राशीको खुल्ला नृत्य प्रतियोगिता सललेरीमा आजबाट 

बैशाख १५, सोलुखुम्बु ।  जिल्लाकै सर्वाधिक एक लाख पुरस्कार राशीको नृत्य प्रतियोगिता सोलुखुम्बुमा सुरु भएको छ ।  दूधकुण्ड ज्वालामाई युवा क्लवको आयोजनामा आजबाट ३ दिन सम्म चल्ने प्रतियोगिताको उद्‌घाटन गरिएको हो ।  सोलुदुकुण्ड नगरपालिकाका मेयर नाम्गेल जाङबु शेर्पाको प्रमुख आतिथ्यतामा सम्पन्न एक औपचारिक कार्यक्रमका बीच प्रतियोगिताको उद्‌घाटन भएको थियो ।

युवा समुहले आफ्नो स्थापनाको अवसरमा आयोजना गरेको यस प्रतियोगिताले जिल्लामा गीत सङ्गीतको संरक्षण तथा सम्वर्द्धन नमा टेवा पुर्याउने विश्वास लिइएको  छ ।  कार्यक्रमका प्रमुख अतिथि तथा सोलुदुधकुण्ड नगरपालिकाका मेयर नाम्गेल जाङबु शेर्पाले समाजसेवा र सामाजिक दायित्व बोकेर स्थापना भएका संस्थाहरूले समाजलाई विकास तर्फ लैजान मद्दत गर्नुपर्ने धारणा राख्नु भयो ।

उहाँले सङ्घसंस्थाहरूले स्थानीय सरकारको साझेदार बन्दै विकास निर्माणमा सहकार्य गर्नुपर्नेमा जोड दिनुभयो ।  कार्यक्रममा माप्य दुधकोशी गाउँपालिकाका उपाध्यक्ष गौरव राईले युवाहरूको आवश्यकताका विभिन्न कार्यक्रमहरू गर्न गाउँपालिकाले सहयोग गर्दै आइरहेको र आगामी दिनहरुमा पनि सहयोग गर्दै जाने उल्लेख गर्नुभएको थियो ।  

कार्यक्रममा युवा समुहका अध्यक्ष टिकाराम परियारको अध्यक्षता थियो सोलुदुधकुण्ड नगरपालिकाका उपप्रमुख गान्धिमाया तामाङ, जिल्ला प्रहरी कार्यालयका सूचना अधिकारी मौसम तामाङ, दुधकुण्ड युवा क्लबका संस्थापक अध्यक्ष तेजराम परियार लगायतको उपस्थिति रहेको थियो ।  प्रतियोगितामा १९ जना नृत्यकारहरुको सहभागीता रहने छ  ।