सोलुखुम्बुमा बालबालिकालाई भिटामिन ए र जुकाको औषधि खुवाइँदै

कार्तिक ११, साेलुखुम्बु । सोलुखुम्बुमा आगाम कार्तिक १७ र १८ गते २ दिन राष्ट्रिय भिटामिन ए तथा जुकाको औषधि खुवाउने कार्यक्रम सञ्चालन हुँने भएको छ । स्वास्थ्य कार्यालय सोलुखुम्बुका अनुसार उक्त कार्यक्रममा जिल्लाका ६ महिनादेखि ५ वर्षमुनिका बालबालिकालाई भिटामिन ए क्याप्सुल तथा १ वर्षदेखि ५ वर्षमुनिका बालबालिकालाई जुकाको औषधि खुवाइनेछ ।

कार्यक्रमअन्तर्गत महिला सामुदायिक स्वास्थ्य स्वयंसेविका, स्वास्थ्य संस्था तथा तोकिएका वितरण केन्द्रमार्फत बालबालिकालाई औषधि खुवाउने व्यवस्था गरिएको स्वास्थ्य कार्यालयले जनाएको छ । जिल्लामा २०२१ को राष्ट्रिय जनगणनाअनुसार ० देखि ४ वर्ष उमेर समूहका ८ हजार ७ सय ५९ बालबालिका रहेका छन् ।

यो उमेर समूहलाई पोषण तथा प्राथमिक स्वास्थ्य सेवाका दृष्टिले महत्वपूर्ण समूह मानिन्छ । स्वास्थ्य कार्यालयले आफ्ना बालबालिकालाई महिला सामुदायिक स्वास्थ्य स्वयंसेविका, स्वास्थ्य संस्था वा तोकिएको वितरण केन्द्रमा लगेर भिटामिन ए तथा जुकाको औषधि खुवाउन अभिभावकलाई आग्रह गरेको छ । भिटामिन एले बालबालिकामा भिटामिन ए को कमीबाट हुने स्वास्थ्य समस्या न्यूनीकरण गर्न सहयोग गर्ने तथा जुकाको औषधिले परजीवीजन्य संक्रमण नियन्त्रणमा सहयोग गर्ने स्वास्थ्यकर्मीहरू बताउँछन् ।