खोटाङमा पहिलो पटक हुँदै खेलकुद, साहित्यिक, साङ्गीतिक तथा पर्यटन महोत्सव

साेलुखुम्बु – प्रथम वृहत खोटाङ हलेसी खेलकुद, साहित्यिक, साङ्गीतिक तथा पर्यटन महोत्सव २०८१ को तयारी सुरु भएको छ । बुधबार पत्रकार सम्मेलन गर्दै नेपाल खेलकुद प्रतिष्ठानले खोटाङमा समतामूलक विकास गराउने उद्देश्य सहित वृहत खोटाङ हलेसी खेलकुद, साहित्यिक, साङ्गीतिक तथा पर्यटन महोत्सवआयोजनाको जानकारी दिएको हो । प्रतिष्ठानले आगामी बैशाख ३१ गते देखी जेठ १० गते सम्म खेलकुद, साहित्य र गायनका विभिन्न कार्यक्रमहरू गर्ने जनाएको छ । प्रतिष्ठानले हाफ म्याराथन तथा अन्य दौड प्रतियोगिता, खुल्ला राष्ट्रिय कविता प्रतियोगिता, १८ वर्ष मुनिको खुल्ला राष्ट्रिय गायन प्रतियोगिता र खुल्ला राष्ट्रिय कराँते प्रतियोगिता गर्ने भएको नेपाल खेलकुद प्रतिष्ठान खोटाङका अध्यक्ष सञ्जय कुमार राईले जानकारी दिनुभयो । प्रतिष्ठानको आयोजना र नेपाल सितोरियो कराँते संघको संयोजनमा हुने महोत्सवका लागी करिब ५२ लाख रुपैँया खर्चहुने छ भने हाल सम्म २५ लाख रुपैँया बजेट जुटिसकेको छ ।

यस्ता छन एथ्लेटिक्स प्रतियोगिताका विधाहरु
महोत्सवमा १२ वर्ष मुनिका छात्राछात्रहरु र ६० वर्ष माथिका भेट्रान पुरुषहरूका लागी १ माइल अर्थात १ हजार ६ सय मिटर, आमा गृहिणीहरूको लागी ३ किलोमिटर, १२ वर्ष देखी १५ वर्ष मुनि सम्मका छात्रछात्राहरूको लागी ५ किलोमिटर दौड प्रतियोगिता, ३५ वर्ष भन्दा माथिको राजनीतिज्ञ, पत्रकार, कर्मचारी, जनप्रतिनिधि, शिक्षकहरूका लागी ७ किलोमिटरको दौड प्रतियोगिता, १५ वर्षदेखि माथिको खुल्ला महिला तथा पुरुषहरूको लागी १० किलोमिटर, खुल्ला पुरुष हाफ म्याराथन र खुल्ला महिला हाफ म्याराथन समान २१ दशमलव ०९७५ किमि दौड प्रतियोगिता गर्ने तय भएको छ ।

महिला र पुरुषलाई समान पुरस्कार
प्रथम वृहत खोटाङ हलेसी खेलकुद, साहित्यिक, साङ्गीतिक तथा पर्यटन महोत्सव २०८१ को आयोजना गरेको नेपाल खेलकुद प्रतिष्ठानले कराँतेमा प्रथम, द्वितीय, तृतीय, चौथो हुने टिमका लागी छुट्टाछुट्टै १ लाख ११ हजार १ सय ११, ५५ हजार ५ सय ५५, ३३ हजार ३ सय ३३, २२ हजार २ सय २२ पुरस्कार घोषणा गरेको छ । कराँतेका उत्कृष्ट पुरुष र महिला खेलाडीका लागी समान २ हजार २ सय २२ र उत्कृष्ट व्यवस्थापकका लागी ११ हजार १ सय ११ रुपैयाँको साथमा ट्रफीको, मेडल र प्रमाण पत्रको व्यवस्था रहेको जनाइएको छ ।  आयोजकले पुरुष र महिलाको लागी समान पुरस्कार सहित दौड प्रतियोगिताको घोषणा गरेको छ ।

प्राय खेलकुद प्रतियोगिताहरूमा छुट्टाछुट्टै प्रतियोगिता र पुरस्कार राशि राख्ने गरिएकोमा प्रतिष्ठानले खुल्ला पुरुष हाफ म्याराथन र खुल्ला महिला हाफ म्याराथन समान २१ दशमलव ०९७५ किमि दौड प्रतियोगिताको पुरस्कार समान राखेको हो । यि विधाका म्याराथन प्रतियोगितामा आयोजकले प्रथमका लागी ७५ हजार, द्वितीयका लागी ५० हजार, तृतीयका लागी २५ हजार, चौथोका लागी १५ हजार, पाँचौ पुरस्कार १० हजार, छैटौँ पुरस्कार ७ हजार र सातौँ पुरस्कार ५ हजारको साथमा ट्रफी मेडल र प्रमाणपत्र प्रदान गरिने आयोजकले जनाएको छ । यस्तै राष्ट्रिय साहित्य तर्फ प्रथम ४ हजार, द्वितीय २५ हजार, तृतीय १७ हजार, चौथो ११ हजार र पाँचौ ७ हजार रुपैयाँ पुरस्कारको घोषणा गरिएको छ ।

कविता तथा गायन विधाका लागी १÷१ लाख पुरस्कार राशीको घोषण गरिएको छ । आयोजकले एक प्रस्तावपत्र जारी गर्दै प्रायोजन गर्न समेत अनुरोध गरेको छ ।
महोत्सवको आयोजना गर्ने जानकारी फाल्गुन १२ गते पत्रकार सम्मेलन मार्फत गराइएको थियो ।