आज राम नवमी, हलेसीमा जाग्राम सहितको बृहत मेला

साेलुखुम्बु – आज राम नवमी अर्थात भगवान श्रीरामको जन्म दिन । चैत्र शुक्ल अष्टमीका दिन चैते दशैँ मनाएर भोलिपल्ट राम नवमी अर्थात राम पर्व मनाउने चलन छ । आज राम नवमीका दिन हिन्दु धर्मावलम्बीहरूले नजिकका राम मन्दिरमा गएर आस्था र श्रद्धापूर्वक भगवान रामको पूजाआजा गर्ने चलन रहिआएको छ ।

आज पूर्वको पशुपतिनाथ भनेर चिनिने खोटाङको हलेसी महादेव मन्दिरमा १० हजार बढी भक्तजनले पूजाआजा गरेका छन ।  यहाँ प्राय दर्शनार्थीको घुइँचो ने रहने भएपनि आज विशेष राम नवमी परेकोले बढी घुइँचो रहेको हलेसी महादेवस्थान विकास समितिका कार्यकारी निर्देशक सम्मर भुजेलले बताउनुभयो ।  

त्रिधार्मिक क्षेत्रको रुपमा चिनिएको हलेसी मन्दिरमा आज नेपाल सहित भारत, बंगलादेश तथा अन्य बिभिन्न देशका हिन्दु धर्ममा आस्था राख्नेहरूले पूजाआजा गरेका छन । यस्तै हलेसी मन्दिरमा आज राति पनि उत्तिकै घुइँचो रहने उहाँको भनाई छ । दिनभरि पूजा आजा गरेर राति जाग्राम बस्ने भएकाले राति पनि भक्तजनहरूको उत्तिकै घुइँचो रहने उहाँले बताउनुभयो ।  हलेसीमा अबको एक हप्ता सम्म दर्शनार्थीको भिड रहने छ ।