दोर्पूमा माटोको ढिस्कोले पुरिएका व्यक्तिको सशस्त्र प्रहरीद्वारा उद्धार

साउन ४, सोलुखुम्बु । सोलुखुम्बुको सोलुदूधकुण्ड नगरपालिका–६ दोर्पूमा माटोको ढिस्कोले पुरिएका व्यक्तिको सशस्त्र प्रहरीले उद्धार गरेको छ । सोलुखुम्बुकै माप्य दूधकोशी गाउँपालिका–५ बस्ने ४२ वर्षीय तेजबहादुर तामाङ तारजालीको पर्खाल लगाउने क्रममा आज माटोको ढिस्कोले पुरिनुभएको थियो ।

सशस्त्र प्रहरी बल नेपाल आश्रित गुल्म सोलुखुम्बुबाट खटिएको सुरक्षा टोलीले उहाँको उद्धार गरी जिल्ला अस्पताल फाप्लुमा पठाएको छ । उहाँको टाउको र कम्मरको भागमा चोट लागेको छ ।