कोशी प्रदेशको धान रोपाइ ९५ प्रतिशत सकियो  

साउन २१, सोलुखुम्बु । कोशी प्रदेशको धान रोपाई ९५ प्रतिशत बढी सकिएको छ ।  १४ वटा जिल्ला रहेको प्रदेशमा यस वर्षको धान रोपाइ ९५ दशमलव ०१ प्रतिशत सकिएको हो । २ लाख ७६ हजार ३ सय ८६ हेक्टर जम्मा धान लगाउने क्षेत्रफल मध्ये हाल सम्म २ लाख ६२ हजार ६ सय ४ दशमलव ४२ हेक्टर क्षेत्रफलको धान रोपाइ सकिएको हो ।

कृषि विकास निर्देशनालय कोशी प्रदेशका अनुसार प्रदेशको उच्च पहाडी ३ जिल्लाहरू ताप्लेजुङमा ९६ दशमलव ५०, सङ्खुवासभा ९० र सोलुखुम्बुमा ९४ प्रतिशत धान रोपाइ सकिएको छ ।  यस्तै प्रदेशका पहाडी ८ जिल्लाहरू पाँचथरमा ८८, इलाममा ९५, भोजपुरमा ९०, तेह्रथुममा ८०, धनकुटामा ८१,  उदयपुरमा ९६, ओखलढुङ्गामा ९२ र खोटाङमा ९४ दशमलव ६७ प्रतिशत धान रोपाइ सम्पन्न भएको छ ।

यता प्रदेशमा तराईका ३ जिल्लाहरू झापामा ९६ दशमलव ३३, मोरङमा ९८ र सुनसरिमा ९५ प्रतिशत धान रोपाइ सकिएको निर्देशनालयका अधिकृत भवानी बस्नेतले बताउनुभयो । गत वर्षको यही अवधीमा प्रदेशको धान रोपाइ   ९० प्रतिशत मात्र सकिएको थियो ।