कोशी प्रदेशकै पहिलो बन्जी जम्प खुम्बुमा सेप्टेम्बर बाट सुरु हुदै

दिपेन्द्र खनाल , १४ वैशाख, सोलुुखुम्बु ।

हिमाली जिल्ला सोलुखुम्बुमा कोशी प्रदेशकै पहिलो बन्जी जम्प निर्माण भएको छ ।  एभरेष्ट रिकृयशनको १ करोड ५० लाख बढी लगानीमा सोलुखुम्बुको खुम्बूपासाङ ल्हामु गाउँपालिका वडा नम्बर ३ र ५ जोड्ने हिलारी ब्रिजमा ऐतिहासिक बन्जी जम्पको निर्माण गरिएको हो । साहसिक खेलहरूमा सबैभन्दा सुरक्षित सँगै उत्कृष्ट विकल्पको रुपमा समेत चिनिने बन्जी जम्प सोलुखुम्बुको पर्यटकीय क्षेत्र लार्चे दोभान ( हिलारी ब्रिजमा ) निर्माण सम्पन्न गरिएको हो । समुन्द्री सतहबाट ३ हजार मिटर उचाइमा रहेको लार्चे दोभान स्थीत दूधकोशी माथिको पुलमा ४३ मिटर अग्लो बन्जी जम्प निर्माण गरिएको सञ्चालक समिति अध्यक्ष छेपाल दोर्जी शेर्पाले जानकारी दिनुभयो ।

सोलुखुम्बुमा आउने प्राय आन्तरिक तथा बाह्य पर्यटकहरूले हिमालको सुन्दरता तथा त्यसको उचाइको मात्रै आनन्द लिने गरेकोमा अव त्यसको विकल्पमा बन्जि जम्प समेत रहने भएकाले यसले पर्यटन क्षेत्रमा नयाँ आयाम थपेको उहाँको भनाई छ ।  अहिले बन्जी जम्पको काम ९५ प्रतिशत सम्पन्न भइसकेकोले आगामी सेप्टेम्बर १ तारिकबाट व्यवसायिक रुपमा यसको सुरुवात हुने बताइएको छ । खुम्बु क्षेत्रमा स्काइ डाइभिङ पर्यटकहरूका लागी महगाें र सुरक्षाका हिसाबले कम सुरक्षित हुने भएकाले यसको प्रभावकारिता धेरै रहने अध्यक्ष शेर्पाले बताउनुभयो ।

उहाँले भन्नुभयो “प्राय पर्यटकहरू यहाँ आउँदा हिमाल मात्रै हेर्नु पर्छ, अन्य एक्स्ट्रा एक्टिभिटिज छैनन्, स्काइ डाइभिङ महंगो पर्न जान्छ तर अव विकल्पको रुपमा बन्जी जम्प छ । लुक्ला झरेर नाम्चे जाँदा बाटैमा बन्जी जम्पको मजा लिन पाउनुहुन्छ ।”

बन्जी जम्प निर्माणका लागी एभरेष्ट रिकृयशनले विजुलीको आपुर्तिका लागी नाम्चे बाटै ल्याउने व्यवस्थापन गर्दै छ । उक्त काम सम्पन्न भएपछि मन्त्रालयको स्वीकृति पाउनासाथ व्यवसायिक सुरुवात गर्ने योजना रहेको अध्यक्ष शेर्पाले बताउनुभयो । यो बन्जी जम्प सगरमाथा आधार शिविर जाने बाटैमा भएकाले ऐतिहासिक रहेको दावी अध्यक्ष शेर्पाको छ । अहिले बन्जी जम्प निर्माण गरिएको लार्चे दोभान प्रसिद्ध हलिउड फिल्म एभरेष्ट को छायांकन गरिएको स्थान समेत हो ।