सोलुदुधकुण्ड नगरपालिकामा कुकुरको बन्ध्याकरण तथा रेबिज विरुद्धको खोप शिविर जारी

साउन ३२, सोलुखुम्बु । सोलुखुम्बुको सोलुदुधकुण्ड नगरपालिकामा १ सय वटा कुकुरको बन्ध्याकरण तथा रेबिज विरुद्धको खोप लगाइएको छ । सोलुदुधकुण्ड नगरपालिका पशु सेवा शाखा र एनिमल हिलिङ स्टेसन भक्तपुरको संयुक्त आयोजनामा बुधबारबाट सुरु गरिएको शिविरमा १ सय वटा कुकुरहरुको बन्ध्याकरण तथा रेबिज विरुद्धको खोप लगाइएको हो ।

शिविरको पहिलो दिन वडा नम्बर १ टाक्सिन्दुमा २२ वटा, दोस्रो दिन विहिबार वडा नम्बर २ मा ३१ वटा र तेस्रो दिन वडा नम्बर ८ केरुङमा सामुदायिक तथा घरपालुवा कुकुरको निःशुल्क बन्ध्याकरण गरिएको हो । सोलुदुधकुण्ड नगरपालिका पशु शाखाका नायव पशु स्वास्थ्य प्राविधिक गणेश थापाका अनुसार शनिबार वडा नम्बर ३, ४, ५, ६ र ७ को एकसाथ सल्लेरी स्थित बाल मन्दिरको प्राङ्गणमा सञ्चालन गरिने भएको हो ।

सामुदायिक कुकुरको सङ्ख्या न्यूनीकरणका साथै कुकुरले मानिसलाई टोकी हालेमा मानिसमा जोखिम नहोस् भन्ने उद्देश्यका साथ सोलुदुधकुण्ड नगरपालिका पशु शाखाको आयोजनामा हरेक वर्ष घरपालुवा तथा सामुदायिक कुकुरको निःशुल्क बन्ध्याकरण र रेबिज विरुद्धको भ्याक्सिन दिने शिविर सञ्चालन गर्दै आएको छ ।