पत्रकार महासंघ सोलुखुम्बुको अधिवेशन तथा साधारणसभा सकियो

१६ बैशाख, सोलुखुम्बु । नेपाल पत्रकार महासंघ जिल्ला समिति, सोलुखुम्बुको ५ औँ जिल्ला अधिवेशन तथा १५ औँ वार्षिक साधारण सभा सम्पन्न भएको छ । आज सल्लेरीको एक होटलमा नेपाल पत्रकार महासंघ जिल्ला समिति, सोलुखुम्बुका अध्यक्ष नूतन श्रेष्ठको अध्यक्षतामा जिल्ला अधिवेशन तथा साधारण सभा सम्पन्न भएको हो ।

अधिवेशन तथा साधारण सभा कार्यक्रममा नेपाल पत्रकार महासंघ जिल्ला समिति, सोलुखुम्बुका अध्यक्ष नूतन श्रेष्ठले महासङ्घको प्रतिवेदन प्रस्तुत गर्नुभएको छ । यस्तै कार्यक्रमलाई सम्बोधन गर्दै नेपाल पत्रकार महासङ्घका केन्द्रिय सदस्य ललिता शाहले जिल्लामा पत्रकार उत्पादनमा कमी आउनु दुःखको कुरा रहेको बताउनुभएको छ । हाल पत्रकारिता क्षेत्रमा पुराना पत्रकार हराउँदै जानु र नयाँ पुस्ताहरु पत्रकारिता क्षेत्रमा आउने सम्भावना कम देखिनु दुखको कुरा रहेको बताउनुभएको हो । उहाँले जिल्लामा पत्रकारहरूलाई सक्षम बनाउनका लागि प्रदेश र केन्द्र समेत सहयोग गर्ने बताउनुभयो ।

नेपाल पत्रकार महासंघ प्रदेश सदस्य लीला बहादुर सुनुवारले पत्रकारिता क्षेत्रमा नयाँ प्रविधिबाट पत्रकारिता गर्नु आवश्यक रहेको बताउनुभएको छ । जिल्लामा नेपाल पत्रकार महासङ्घको भवन निर्माण का लागि पायक पर्ने जग्गाको व्यवस्थापन गर्न जिल्ला शाखालाई आग्रह गर्नुभएको छ । उक्त कार्यक्रमकामा रेडियो एभरेष्टका प्रबन्ध निर्देशक भानुभक्त निरौला, महासङ्घका पूर्व अध्यक्ष मनोजकुमार श्रेष्ठ लगायत जिल्लाका सक्रिय पत्रकारहरूको उपस्थिति रहेको थियो ।