दुई सातामै सोलुखुम्बुमा आगलागीबाट ५० लाख बढीको क्षति

बैशाख १७ गते, सलिना लामिछाने । नयाँ वर्ष यता हिमाली जिल्ला सोलुखुम्बुमा आगलागीबाट ५३ लाख बराबरको क्षति भएको छ । १५ दिनमै सोलुखुम्बुको बिभिन्न स्थानमा   भएको आगलागीबाट ३ वटा घर सहित सामुदायिक बन र व्यक्तिगत बनमा भएकाे आगलागीबाट ५३ लाख बराबरको क्षति भएको जिल्ला प्रहरी कार्यालय सोलुखुम्बुले जनाएको छ ।

आगलागीबाट जिल्लाको नेचासल्यान गाउँपालिका २ देउपुजेमा गत बैशाख ११ गते स्थानीय धनेश्वर राई र निजका छोरा शक्ती राईको ३ तले ढुङ्गा माटोले बनेको टिनको छानो भएको घर तथा घर भित्र रहेको लत्ताकपडा कागजपत्र, ३ तोला सुन, १५ तोला चाँदी, भाडाबर्तन, काठपात लगायत अन्नपात पुर्ण रुपमा जलेको थियो । यस्तै उनका छोरा शक्तिको  १ तले खरको छानो भएको घर,  ग्वाली सहित जल्दा दुबै जनाको गरि जम्मा २३ लाख बराबरको क्षति भएको तथ्याङ्क प्रहरी सँग छ । उक्त आगलागी स्थानीय गाईखर्क सामुदायिक बनबाट सुरु भएर गाउँ छिरेको थियो ।

यता सोही स्थानका मक्कर बहादुर राईका छोरा केशव राईको १ तले टिनको छानो भएको र २ तले खरको छानो भएको घर जलेका थिए । २ घर जल्दा घर भित्र  रहेका लत्ताकपडा, कागजपत्र, नगद १ लाख ८० हजार सुन आधा तोला चाँदी ३ तोला, भाडाबर्तन, काठपात लगायत अन्नपात पूर्ण रुपमा जलि २० लाखको क्षति भएको छ । त्यस्तै करबिर राईको ३ तले ढुङ्गा माटोले बनेका घर घर भित्र रहेको लत्ताकपडा कागज पत्र सुन चाँदी भाँडावर्तन काठपात लगायत अन्नपात पूर्ण रुपमा जलि १० लाख बराबरको क्षति भएको छ ।

बैशाख १ गते सोलुदुधकुण्ड नगरपालिका ७ बाराने स्थित ओम सिह कार्कीको निजी जङ्गलमा आगलागी हुँदा  १५÷१६ रोपनी क्षेत्रफलको  बोट बिरुवाहरू जली नष्ट भएको छ । बैशाख ५ गते सोलुखुम्बुको थुलुङदुधकोशी गाउँपालिका ६ स्थित डाँडाखेत छतिउन सामुदायिक बनमा आगलागी हुँदा त्यहाँ रहेका बोट बिरुवा जली नष्ट भएको छ । त्यस्तै बैशाख ७ गते थुलुङदुधकोशी गाउँपालिका २ निवासी गैरी थाक्ले राष्ट्रिय बनमा आगलागी हुँदा बनमा धेरै क्षति भएको छ । बैशाख १३ गते सोलुदुधकुण्ड नगरपालिका ४ लुरा स्थित कामी कान्छी  शेर्पाको व्यक्तिगत बनमा पनि आगलागी भएको हो ।

 बैशाख १५ गते सोलुखुम्बु जिल्लाको नेचासल्यान गाउँपालिका ४ पुरानो खानी स्थित घोडाखोरी सामुदायिक बनमा आगलागी हुँदा ६० रोपनी क्षेत्रफलमा आगो लागेको थियो । सोलुखुम्बुमा याे वर्ष आगलागीबाट  मानवीय वा चौपाया क्षति भने नभएको जिल्ला प्रहरी कार्यालय सोलुखुम्बुका प्रहरी नायब उपरीक्षक  डीएसपी द्वारिका प्रसाद घिमिरेले जानकारी दिनुभयो ।