जिल्ला प्रशासन कार्यालय साेलुखुम्बुले सुरु गर्यो राष्ट्रिय गान गाएर मात्र कार्यालय प्रवेश गर्ने कार्य 

भदौ ४, सोलुखुम्बु ।  जिल्ला प्रशासन कार्यालय सोलुखुम्बुले राष्ट्रिय गान गाएर / बजाएर कार्यालय प्रवेश गर्ने परिपाटीको सुरुवात गरेको छ । जिल्लाको प्रमुख सरकारी अड्डा जिल्ला प्रशासनमा गत भाद्र २ गतेबाट बिहान १० बजे राष्ट्रिय गान बजाएरमात्रै कार्यालय प्रवेश गर्ने कार्य सुरु गरिएको हो ।

सरकारी कार्यालयमा कार्यरत कर्मचारीहरूको प्रमुख राष्ट्र सेवा गर्नु भएकाले कर्मचारीहरूमा राष्ट्र प्रेम जागृत गराउन यसले सहयोग पुग्ने प्रमुख जिल्ला अधिकारी देवी पाण्डे खत्रीको भनाई छ ।  कार्यालय प्रवेश गर्नु अगाडि राष्ट्रिय गान बजाएर प्रबेश गर्दा कर्मचारीमा देश प्रतिको प्रेम बढेर जाने पनि उहाँले बताउनुभयो ।

यसका साथै कार्यालयमा कर्मचारी आए नआएको निगरानी हुने, पोशाकमा भए वा नभएको अनुगमन हुने भएकाले पनि यो कार्यको थालनी गरिएको उहाँले बताउनुभयो । राष्ट्रिय गान बजाएर कार्यालय प्रवेश गर्दा कर्मचारीहरूमा अनुशासन कायम हुने भएकाले यसलाई निरन्तरता दिनुपर्ने आवश्यकता रहने प्रजिअ खत्रीले बताउनुभयो ।