आर्थिक सहयोग जुटाएर सरस्वती माबि पाथेकामा ‘प्लस–टु’ उद्घाटन

भदौ ६, सोलुखुम्बु । खोटाङको दिक्तेल रुपाकोट मझुवागढी नगरपालिका–१० लुङथुङ कोलडाडाँ पाथेकास्थित सरस्वती माबिमा ‘प्लस–टु’को कक्षा सुरु गरिएको छ । २०१७ सालमा स्थापना गरिएको यस विद्यालयमा भदौ ६ गतेदेखि पठनपाठन हुनेगरी कक्षा ११ उद्घाटन गरिएको हो ।

भदौ ५ गते विद्यालयमा आयोजित कार्यक्रममा दिक्तेल रुपाकोट मझुवागढी नगरपालिकाका मेयर तीर्थराज भट्टराईले कक्षा ११ उद्घाटन गरेका हुन् । अभिभावक र शुबेच्छुक बाट आर्थिक सहयोग जुटाएर कक्षा ११ र १२ सञ्चालन सुरु गरिएको सरस्वती माबिका प्रअ उत्रप्रसाद राईले बताए । राईले भने,पाथेका भौगोलिक रुपमा ठूलो भएको तथा केपिलासगढी गाउँपालिका–२ र ३ सम्मका विद्यार्थी लाभान्वित हुने भएकाले सरस्वती माबिमा कक्षा ११ र १२ को पठनपाठन सुरु गरिएको हो ।

कक्षा ११ र १२ सञ्चालनका लागि हालसम्म स्वदेश तथा विदेशमा रहेका ३९८ अभिभावक शुबेच्छुक बाट ३१ लाख १ हजार ८०४ रुपैयाँ सहयोग संकलन भइसकेको छ । कक्षा ११ र १२ सञ्चालन गर्न अघि सरेको विद्यालयलाई नगरपालिकाले २०८१ जेठ ७ गते अनुमति दिएको थियो ।

कक्षा ११ र १२ पठनपाठनका लागि नगरपालिकाले दीर्घकालिन श्रोतको व्यवस्था गर्नुपर्ने अभिभावकको माग छ । सरस्वती माबिमा हाल ३०३ विद्यार्थी अध्ययनरत छन् । गाउँमै बालबच्चा पठाउने अभिभावकको मागको आधारमा माथिल्लो कक्षामा आर्टस्, कमर्स र इजुकेसन संकालय पढ्न मिल्नेगरी कक्षा ११ र १२ को पठनपाठन सुरु गरिएको ‘कक्षा ११–१२ सञ्चालन मुल संयोजन समिति’का संयोजक धनप्रसाद गिरीले बताए । पठनपाठनका लागि विद्यालयले तारामनी कट्टेल र भूपाल चर्माकारलाई नियुक्ती गरेको छ ।