लिखुपिकेमा चौथो अध्यक्ष कप भलिबल प्रतियोगिता र कृषि मेला एकैसाथ सुरु

कार्तिक १८, सोलुखुम्बु । सोलुखुम्बुको लिखुपिके गाउँपालिकामा चौथो संस्करणको अध्यक्ष कप भलिबल प्रतियोगिता सुरु भएको छ। गाउँपालिकामा खेलकुद क्षेत्रको विकास तथा स्थानीय प्रतिभाको पहिचान र प्रवर्द्धन गर्ने उद्देश्यले सुरु गरिएको प्रतियोगिता विगत चार संस्करणदेखि निरन्तर सञ्चालन हुँदै आएको छ। गाउँपालिकाको केन्द्र चौलाखर्कमा आज एकैसाथ दुई महत्वपूर्ण कार्यक्रमको उद्घाटन गरिएको हो। खेलकुद क्षेत्रको विकाससँगै कृषि उत्पादनको प्रवर्द्धन र किसानलाई प्रोत्साहन गर्ने उद्देश्यले गाउँपालिकाले अध्यक्ष कप भलिबल प्रतियोगितासँगै कृषि मेला तथा प्रदर्शनी आयोजना गरेको हो।

गाउँपालिका अध्यक्ष मिना कार्की बस्नेतको अध्यक्षता तथा प्रतिनिधिसभा सदस्य रिना उप्रेती केसीको प्रमुख आतिथ्यतामा दुवै कार्यक्रमको उद्घाटन सत्र सम्पन्न भएको थियो। आयोजकका अनुसार भलिबल प्रतियोगितामा विभिन्न स्थानबाट आएका १४ टोलीको सहभागिता रहेको छ। प्रतियोगिताले स्थानीयस्तरमा खेलकुद गतिविधि विस्तार गर्नुका साथै खेलाडीहरूको क्षमता प्रदर्शन गर्ने अवसर प्रदान गर्ने अपेक्षा गरिएको छ। त्यस्तै, कृषि मेला तथा प्रदर्शनीमा गाउँपालिकाभित्र उत्पादित विभिन्न कृषि उपज प्रदर्शनका लागि सयौँ किसानले आफ्ना उत्पादनसहित सहभागिता जनाएका छन्। प्रदर्शनीमार्फत स्थानीय कृषि उत्पादनको पहिचान, बजारीकरण तथा किसानलाई व्यावसायिक कृषितर्फ आकर्षित गर्ने लक्ष्य राखिएको गाउँपालिकाले जनाएको छ।

कार्यक्रममा बोल्दै प्रमुख अतिथि प्रतिनिधिसभा सदस्य रिना उप्रेती केसीले लिखुपिके गाउँपालिका पर्यटन, कृषि र खेलकुदका क्षेत्रमा प्रशस्त सम्भावना बोकेको पालिका भएको उल्लेख गर्नुभयो। यहाँ उपलब्ध सम्भावनालाई सही ढंगले उपयोग गर्न सके समग्र पालिकाको आर्थिक तथा सामाजिक विकासमा महत्वपूर्ण योगदान पुग्ने उहाँको भनाइ थियो। त्यसैगरी, गाउँपालिका अध्यक्ष मिना कार्की बस्नेतले कृषि क्षेत्रको विकासका लागि गाउँपालिकाले विभिन्न कार्यक्रम सञ्चालन गर्दै करोडौँ रुपैयाँ बजेट खर्च गरेको उल्लेख गर्नुभयो।

कृषि क्षेत्रमा गरिएको लगानी र त्यसबाट प्राप्त उपलब्धिको मूल्यांकन गर्नुका साथै किसानले उत्पादन गरेका वस्तुको पहिचान र प्रोत्साहन गर्ने उद्देश्यले कृषि मेला तथा प्रदर्शनी आयोजना गरिएको उहाँले बताउनुभयो। खेलकुद र कृषिलाई एकैसाथ प्राथमिकतामा राख्दै आयोजना गरिएका यी कार्यक्रमले लिखुपिकेको स्थानीय उत्पादन, खेल प्रतिभा र समग्र विकासको सम्भावनालाई उजागर गर्ने अपेक्षा गरिएको छ।