रेडियो एभरेष्टले अनलाइन कविता प्रतियोगिता गर्दै, भदौ १५ सम्म कविता पठाइसक्नुपर्ने 

भदौ १३, सोलुखुम्बु । हिमाली जिल्ला सोलुखुम्बुमा स्थापित रेडियो एभरेष्ट ९६ दशमलव ८ मेगाहर्जले विभिन्न रचनात्मक अनलाइन प्रतियोगिताको आयोजना गर्ने भएको छ ।  नेपालमा खुलेका रेडियोको इतिहासमै पहिलो पटक हेर्ने रेडियोको अवधारणा सहित अगाढी बढेको रेडियो एभरेष्टले अनलाइन कविता, गजल, गायन लगायतका प्रतियोगिता आयोजना गर्ने भएको हो । जसमध्ये पहिलो चरणमा कविता प्रतियोगिता आयोजना गर्ने भएको छ ।  

डिजिटल युगमा डिजिटल माध्यमको सदुपयोग गर्दै अन्तरनिहित प्रतिभा प्रस्फुटनमा सहयोग गर्ने हेतुले रेडियोले अनलाइन प्रतियोगिता अन्तर्गत पहिलो चरणमा अनलाइन कविता प्रतियोगिता आयोजना गर्ने भएको रेडियो एभरेष्टका संस्थापक कोषाध्यक्ष एवं मार्केटिङ म्यानेजर गोमा बस्नेतले बताउनुभयो ।  स्रष्टा र कलाको सम्मान रेडियो एभरेष्टको अभियान भन्ने मुल नाराका साथ सुरु हुन लागेको अनलाइन कविता प्रतियोगितामा सहभागिता जनाउनका लागी सहभागीहरूले नेपालमा युवाको भविष्य शीर्षकमा भिडियो मार्फत आफ्नो कवितारेकर्ड गरेर पठाउनुपर्ने छ । जसका लागी रेडियो एभरेष्टको आधिकारिक इमेल     अथवा ह्वाट्सएप नम्बर ९८५१३५८१८५ लगायत भाइबर जस्ता माध्यम उपलब्ध गराएको छ ।  

आफै द्धारा सृजित कविताका साथै कविता कम्तीमा ३ मिनेट भन्दा माथि भएमात्रै छनौट सूचीमा पर्ने उहाँको भनाई छ । सहभागीहरूले कविता आगामी भदौ १५ गते सम्म पठाइसक्नु पर्ने जनाइएको छ । कविताको मूल्याङ्कनका लागी साहित्य क्षेत्रमा दख्खल राखेका व्यक्तिहरूबाट साथै लेखन स्तर, वाचन शैली र फेसबुकमा सेयर तथा भ्युका आधारमा हुने छ । प्रतियोगितामा सहभागिता जनाएर विजेता हुने कविहरूले प्रथम, द्वितीय र तृतीय पुरस्कार क्रमशः ५ हजार, ३ हजार र २ हजार नगदको साथमा प्रमाणपत्र प्रदान गरिने जनाइएको छ ।  प्रतियोगितामा सहभागिता जनाउन नेपाल सहित विश्वका जुनसुकै देशमा रहेका नेपालीहरूले पाउने छन् ।