सोलुखुम्बुका लघुवित्तमा धमाधम ताला लगाउदै सङ्घर्ष समिति 

भदौ १३, सोलुखुम्बु  । लघुवित्त तथा वित्तीय शोषण विरुद्ध सङ्घर्ष समिति सोलुखुम्बुले धमाधम जिल्लाका लघुवित्त तथा सहकारीमा ताला लगाउन थालेको छ ।  सहकारी आतङ्कले जनताहरूलाई  अनावश्यक दुख दिइरहेको भन्दै सङ्घर्ष समिति सोलुखुम्बुले जिल्लाका विभिन्न स्थानमा रहेका सहकारीमा तालाबन्दी गरिरहेको हो ।

 समितिले हिजो मात्रै नेचासल्यान गाउँपालिकाको महिला उत्थान लघुवित्त वित्तिय संस्था  तालाबन्दी गरेको थियो । देशभर सहकारी आतङ्कका कारण १५ सय बढी महिलाहरूले आत्महत्या गरिसकेको, हजारौँको सङ्ख्यामा कालोसूचीमा राखेर यातना दिइरहेको, नागरिकलाई घरबार विहीन बनाएको लगायतका समस्याबाट पीडितहरूलाई मुक्ति दिन सहकारी संस्थाहरू बन्द गर्नुपर्ने माग उनीहरूको छ ।

 १ सय ८० दिन सम्म धर्नामा बसेका महिलाहरूलाई न्याय दिनुपर्ने, लघुवित्त वित्तिय संस्थाहरूले लगाएको सामूहिक ऋण मिनाहा हुनुपर्ने, गरिवहरुलाई निशुल्क ऋण दिनुपर्ने, आवश्यकताका आधारमा काम र दामको व्यवस्था गर्नुपर्ने, समाजवादी अर्थतन्त्रको विकास गर्नुपर्ने लगायतका माग उनीहरूको छ । संघर्ष समितिले माग पुरा नभएसम्म सहकारी संस्थाहरूलाई ताला लगाउने समितिका जिल्ला अध्यक्ष गुणराज भट्टराईको भनाई छ ।