पौडी खेल्न पसेका ३ मध्ये  एक बालकको डुबेर मृत्यु 

भदौ १४, सोलुखुम्बु ।  सोलुखुम्बुको थुलुङ दुधकोशी गाउँपालिकामा पोखरीमा डुब्दा एक बालकको मृत्यु भएको छ । गाउँपालिकाको  वडा नम्बर– ४ मूलखर्कको साउने पोखरीमा डुब्दा प्रसन्न तामाङको मृत्यु भएको हो । विद्यालयबाट घर फर्कने क्रममा आफ्ना अन्य २ जना साथीहरू सँग पोखरीमा पसेका तामाङको मृत्यु भएको जिल्ला प्रहरी कार्यालय सोलुखुम्बले जनाएको छ ।

  स्थानीय विक्रम तामाङका ७ वर्षीय छोरा प्रसन्नको डुबेर मृत्यु भएपछि जिल्ला प्रहरी कार्यालय खोलुखुम्बुको निर्देशनमा प्रहरी चौकी सुकेबाट प्रहरी पुगिसकेको र आवश्यक अनुसन्धान भइरहेको जिल्ला प्रहरी कार्यालय सोलुखुम्बुका प्रहरी नायब उपरीक्षक द्वारीका प्रसाद घिमिरेले जानकारी दिनुभयो ।  घटनाको बारेमा वृस्तित विवरण आउन बाकी छ ।