केपिलासगढीमा उत्कृष्ट शिक्षकलाई गाउँपालिकाको शैक्षिक पुरस्कार

असोज २, सोलुखुम्बु । खोटाङको केपिलासगढी गाउँपालिकाले उत्कृष्ट दुई जना प्रधानाध्यापक र उत्कृष्ट तीन जना शिक्षकलाई पुरस्कृत गरेको छ । बुधबार शिक्षा दिवसका अवसरमा पृथ्वी मावि बाक्सिलामा कार्यक्रम गरेर माध्यमिक तहतर्फ जालपा मावि पिपलडाँडा बाक्सिलाका प्रधानाध्यापक रेश कुमार खत्री र आधारभूत तहतर्फ लालीगुराँस आधारभूत विद्यालय फेदीका प्रधानाध्यापक गौ बहादुर राईलाई पुरस्कृत गरेको हो ।

यस्तै मावि तहको उत्कृष्ट शिक्षकमा पृथ्वी मावि बाक्सिलाका चण्डी प्रसाद रिमाल, आधारभूत तहको उत्कृष्ट शिक्षकमा पृथ्वी माविकै मालती राजभण्डारी र आधारभूत तहमै थर्पुडाँडा मावि सप्तेश्वरका ममिता राई उत्कृष्ट शिक्षक छनौट भएकी छन्। मावितर्फ एसईईको नतिजाका आधारमा र आधारभूततर्फ अनुशासित, नियमितता र कार्य सम्पादनका आधारमा उत्कृष्ट छनौट गरिएको शिक्षा शाखा प्रमुख सुरेन्द्र खनालले जानकारी दिनुभयो ।

उत्कष्ट प्रअ र शिक्षकलाई कोशी प्रदेशका पूर्वमन्त्री राजन राई र गाउँपालिका अध्यक्ष समिर राईले जनही दश हजारसहित प्रमाणपत्र प्रदान गर्नुभएको थियो। उक्त गाउँपालिकामा सामुदायिकतर्फ ९ वटा मावि र ५ वटा आधारभूत विद्यालय रहेका छन् ।