बैठकमा आएका अतिथिलाई स्थानीय अल्लोको टोपी उपहार 

चैत्र १२, सोलुखुम्बु ।  मङ्गलबार जिल्ला समन्वय समिति महासङ्घ कोशी प्रदेशको बैठकमा सोलुखुम्बु आइपुगेका अतिथिहरूलाई स्थानीय अल्लोबाट बनेका टोपी उपहार दिइएको छ ।  सतौँ बैठकको आयोजक जिल्ला समन्वय समिति सोलुखुम्बुले अतिथिहरूलाई अल्लोबाट बनेको टोपी मायाको चिनोको रुपमा प्रदान गरेको हो ।  

स्थानीय उत्पादनको प्रवर्द्धन गर्ने उद्देश्यले जिल्ला समन्वय समिति सोलुखुम्बुका प्रमुख कृष्ण प्रसाद निरौलाले ११ वटा जिल्लाका समन्वय समिति प्रमुख तथा उपप्रमुख एवं सदस्यहरूलाई सोलुखुम्बुमै अल्लोबाट बनेको टोपी र महिला प्रतिनिधिहरूलाई क्याप उपहार स्वरुप प्रदान गर्नुभएको हो ।

उहाँले बैठकमा आउने सबै प्रमुख उपप्रमुख तथा सदस्यहरूलाई उपहार प्रदान गर्दै स्वदेशी उत्पादनको प्रवर्द्धन गर्न सबैले आ आफ्नो तवरबाट लागी पर्न आग्रह गर्नुभयो । जिल्ला समन्वय समिति महासङ्घका केन्द्रिय कोषाध्यक्ष सनबहादुर राईको प्रमुख आतिथ्यता एवं जिल्ला समन्वय समिति भोजपुरका प्रमुख तथा महासङ्घ कोशी प्रदेश महासङ्घका अध्यक्ष कमल थुलुङको अध्यक्षतामा सम्पन्न बैठक सोलुखुम्बुको पर्यटकीय स्थल सेलगुडी डाँडामा भएको थियो । महासङ्घको अर्को बैठक ३ महिना पछि उदयपुरका गर्ने बैठकले निर्णय समेत गरेका छ ।