जिल्ला समन्वय समिति महासङ्घ कोशी प्रदेशको बैठक सोलुखुम्बुमा 

चैत्र १२, सोलुखुम्बु । जिल्ला समन्वय समिति महासङ्घ कोशी प्रदेशको बैठक सोलुखुम्बुको सेलगुडीडाडाँमा बसेको छ । जिल्ला समन्वय समिति सोलुखुम्बुको आयोजनामा बैठक पहिलो पटक ३ हजार १ सय मिटरको उचाइमा बसेको हो ।  बैठकमा कोशी प्रदेशका ११ वटा जिल्लाका समन्वय समिति प्रमुखहरूको उपस्थिति रहेको थियो ।  हरेक बैठक प्रदेशभरिका जिल्लामा गर्ने महासङ्घको पुरानो परिपाटीलाई निरन्तरता दिँदै सातौँ बैठक जिल्लाको सेलगुडीमा आयोजना गरिएको जिल्ला समन्वय समिति कोशी प्रदेशका अध्यक्ष कमल थुलुङले बताउनुभयो ।  जिल्ला समन्वय समिति महासङ्घका कोषाध्यक्ष सनबहादुर राईको प्रमुख आतिथ्यता तथा जिल्ला समन्वय समिति भोजपुरका प्रमुख कमल थुलुङको अध्यक्षतामा सम्पन्न बैठकले जिल्ला समन्वय समितिलाई अधिकार सम्पन्न बनाउन ३ तहका सरकारसँगको सम्बन्धलाई थप विस्तार गर्दै लैजाने गरि निर्णय गरेको छ ।  बैठकमा जिल्ला समन्वय समितिलाई आईटी अफिसरको आवश्यकता भएकोले उक्त पदका लागी दरबन्दी श्रीजना गर्न तालुक निकायमा पहल गर्ने लगायत विभिन्न निर्णय गरिएको आयोजक जिल्ला समन्वय समिति समोलुखुम्बुका प्रमुख कृष्ण प्रसाद निरौलाले बताउनुभयो ।  कार्यक्रममा जिल्ला खोटाङ, ओखलढुङ्गा, सोलुखुम्बु, पाँचथर, उदयपुर, भोजपुर, सङ्खुवासभा, तेह्रथुम, धनकुटा लगायत जिल्लाका प्रमुखहरू तथा उपप्रमुखहरू उपस्थित थिए ।