सुशासन प्रवद्र्धनमा खिजीदेम्बाको पहलः वडास्तरीय समिक्षा र सार्वजनिक सुनुवाई सकियो

बैशाख २०, सोलुखुम्बु । नियमित सार्वजनिक सुनुवाई र सुशासनको अभ्यासमा उदासीन देखिएका अधिकांश स्थानीय तहहरुको तुलनामा ओखलढुङ्गाको खिजीदेम्बा गाउँपालिका भने राम्रो अभ्यासको उदाहरण बन्न थालेको छ । पारदर्शिता र उत्तरदायित्व सुनिश्चित गर्न गाउँपालिकाले पहिलोपटक वडास्तरीय कार्यप्रगति समिक्षा, साक्षात्कार तथा सार्वजनिक सुनुवाईको औपचारिक अभियान संचालन गरेको हो ।

बैशाख १२ गतेदेखि सुरु भई १९ गते समापन भएको यो अभियान अन्तर्गत ९ वटै वडामा विकास आयोजनाको अवस्थाको स्थलगत मूल्याङ्कन, उपभोक्ता समिति गठन प्रक्रिया, सूचना पाटी मार्फत सूचना प्रवाह, र नागरिकबाट सिधा सुझाव संकलन गरिएको गाउँपालिका अध्यक्ष गम्बु शेर्पाले जानकारी दिनुभयो । उक्त अभियानमार्फत सरकारी सेवाप्रति नागरिक सन्तुष्टि पनि मापन गरिएको छ । पत्रकारहरुको सहकार्यमा नागरिक सर्वेक्षण गरिएको छ जसमा सेवा पाउने अवस्था, सेवा पाउन लागेको समय, कर्मचारी र जनप्रतिनिधिको व्यवहार, तथा अतिरिक्त शुल्कको अनुभव लगायत २० वटा मापदण्ड समेटिएका छन् ।

यस्तै सर्वेक्षण र नागरिकको साक्षात्कारबाट प्राप्त सुझावलाई आगामी नीति, कार्यक्रम तथा बजेट निर्माणमा प्रयोग प्रमुख प्रशासकीय अधिकृत गौरवराज केसीले बताउनुभयो । खिजीदेम्बाको यो अभ्यास संघीयताको मर्म अनुसार पारदर्शी, जवाफदेही र सहभागी शासन प्रणालीको स्पष्ट नमूना बनेको छ । ओखलढुङ्गाका अन्य पालिकाहरुलाई समेत यसबाट प्रेरणा लिन सकिने अपेक्षा गरिएको छ ।