पाँचखपन नगरपालिकाले जित्यो तेस्रो चिशंखुगढी कपको उपाधि

बैशाख २०, सोलुखुम्बु । ओखलढुङ्गाको चिसंखुगढी गाउँपालिकाको आयोजनामा सम्पन्न तेस्रो चिशंखुगढी कप अन्तरपालिका स्तरीय खुल्ला पुरुष भलिबल प्रतियोगिताको उपाधि सङ्खुवासभाको पाँचखपन नगरपालिकाले हात पारेको छ । शनिवार सम्पन्न फाइनल खेलमा पाँचखपनले ओखलढुङ्गाको मोलुङ गाउँपालिकालाई सोझो सेटमा २५–१८, २५–१९ र २५–१७ को सेटमा पराजित गर्दै उपाधि आफ्नो पक्षमा पारेको हो । उपाधिसहित पाँचखपनले नगद २ लाख २२ हजार २२२, ट्रफी, मेडल र प्रमाणपत्र प्राप्त गरेको छ । उपविजेता मोलुङ गाउँपालिकाले नगद १ लाख ५५ हजार ५५५, ट्रफी, मेडल र प्रमाणपत्र प्राप्त पारेको आयोजकले जनाएको छ ।

यसअघि शुक्रबार सम्पन्न तेस्रो स्थानका लागि भएको खेलमा ओखलढुङ्गाको चम्पादेवी गाउँपालिकाले खोटाङको रावाबेसी गाउँपालिकालाई पराजित गर्दै तेस्रो स्थान हासिल गरेको छ । चम्पादेवीले नगद १ लाख ११ हजार १११, ट्रफी, मेडल र प्रमाणपत्र प्राप्त गरेको छ । सान्त्वना स्थानमा रहेको रावाबेसीले पनि नगद ५५ हजार ५५५ सहित ट्रफी, मेडल र प्रमाणपत्र प्राप्त गरेको छ । प्रतियोगितामा उत्कृष्ट व्यक्तिगत प्रदर्शन गर्ने खेलाडीहरूलाई विधागत पुरस्कार पनि प्रदान गरिएको थियो ।

पाँचखपनका रोमन बस्नेत ‘सर्वोत्कृष्ट खेलाडी’ घोषित भए। उनीसँगै पाँचखपनकै विष्णु बस्नेत ‘उत्कृष्ट ओपन स्पाइकर’, मनोज घिमिरे ‘उत्कृष्ट सेटर’, सन्तोष राई ‘उत्कृष्ट लिबेरो’, निरुप बस्नेत ‘उत्कृष्ट क्विक स्पाइकर’ घोषित भए। मोलुङ गाउँपालिकाका समीप श्रेष्ठ ‘उत्कृष्ट सर्भर’ र अर्जुन कटवाल ‘उत्कृष्ट ब्लकर’ बने। यस्तै, चम्पादेवीका अनिल श्रेष्ठ ‘अनुशासित खेलाडी’ घोषित भएका छन् । सर्वोत्कृष्ट खेलाडीले नगद११ हजार १११ प्राप्त गरे भने अन्य विधागत उत्कृष्ट खेलाडीहरूले नगद रु ५ हजार ५५५, ट्रफी, मेडल र प्रमाणपत्र प्राप्त गरेका छन् ।

विजेता तथा अन्य पुरस्कार प्राप्त खेलाडीहरूलाई चिसंखुगढी गाउँपालिकाका अध्यक्ष निशान्त शर्मा, उपाध्यक्ष सन्तोष बाबु थापा, प्रमुख प्रशासकीय अधिकृत सीताराम राई तथा वडा अध्यक्ष लगायतका विशिष्ट अतिथिहरूले सम्मानित गरेका थिए ।