खोटाङका ग्रामीण भेगका बजारमा सिसि क्यामरा जडान, आपराधिक कृयाकलाप नियन्त्रणमा सहयोगी बन्ने अपेक्षा

बैशाख २६, सोलुखुम्बु । खोटाङको दिक्तेल रूपाकोट मझुवागढी नगरपालिकाका २ वटा वडामा सिसि क्यामरा जडान गरिएको छ ।  अपराधिक कृयाकलापको निगरानी गर्दै त्यसको नियन्त्रणका लागी नगरपालिकाको वडा नम्बर १४ बुइपा र विजयखर्कका विभिन्न ठाउँमा सिसि क्यामरा जडान गरिएको हो ।

 बुइपा प्रहरी चौकी व्यवस्थापन समितिको अगुवाईमा नागरिक साझेदारीबाट रकम सङ्कलन गरि प्रहरी चौकीको कार्यालय व्यवस्थापन तथा प्रतिक्षालय निर्माण सँगै २ वटा वडाका सिमा नाकाहरूमा सिसि क्यामरा जडान गरिएको जनाइएको छ ।  दाताहरूबाट सङ्कलन भएको ७ लाख रुपैयाँ, नगरपालिकाको २ लाख रुपैयाँ, वडा नम्बर १५ विजयखर्ककाे १ लाख रुपैयाँ र वडा कार्यालय बुइपाको १ लाख ११ हजार १ सय ११ रुपैयाँबाट प्रहरी चौकीको सौन्दर्यकरण सहित सिसि क्यामरा जडान, प्रहरी साझेदारी बडापत्र स्थापना लगायतका काम गरिएको प्रहरी चौकी व्यवस्थापन समितिका अध्यक्ष तथा नेपाली काङ्ग्रेस वडा कार्य समिति विजयखर्कका सभापति सन्तोष राईले बताउनुभयो ।

 उहाँका अनुसार २ वटा वडाका विभिन्न ठाउँमा गरि करिव २० वटा सिसि क्यामरा जडान गर्ने लक्ष भएपनि हाललाई १४ वटा क्यामरा जडान गरिएको छ । ति मध्ये  बुइपा स्थित पञ्चदोवाटो बजारमा ७ वटा, बुइपा प्रहरी चौकी परिसरमा २ वटा र विजयखर्क वडा कार्यालय सहित विभिन्न ठाउँमा ५ वटा क्यामरा जडान गरिएको छ ।  उक्त जडित सिसि क्यामराको मनिटरिङ प्रहरी चौकी बुइपा बाट चौबीसै घण्टा हुने अध्यक्ष राईले बताउनुभयो । सिसि क्यामरा जडान गरिसकेपछि प्रहरीलाई यहाँको हरेक गतिविधिको निगरानी गर्न सहज हुने जिल्ला प्रहरी कार्यालय खोटाङले जनाएको छ ।