बैशाख २७, सोलुखुम्बु । आन्तरिक पर्यटन प्रबर्द्धन गर्ने उद्देश्यले शुरु भएको स्पार्क एडभेण्चर कार्यक्रम अन्तर्गत महानायक राजेश हमला देखि विभिन्न क्षेत्रका दुई सय अगुवाहरू सोलुखुम्बुको पत्ताले र गौरिटाप क्षेत्र आईपुगेका छन् । स्पार्क कारले गौरिटापमा महानायक राजेश हमाल, अभिनेता क्याप्टेन विजय लामा, गायक राजु लामा, गायीक आनि छोईङ डोल्मा, आस्था राउत, कलाकार सन्दिप क्षेत्री, उद्योगी ब्यवशायी, पत्रकार लगायत २ सय जनाको टोली ईलेक्ट्रिक गाडी चढेर ३ हजार मिटरको उचाईमा रहेको गौरिटाप क्षेत्र आईपुगेको हो । शुक्रबार राति यहाँ आएका बिशिष्ट ब्यक्तिहरुलाई राति सुत्नको लागि एक सय भन्दा बढी टेण्ट टाँगिएको थियो ।
समुन्द्र सतहबाट ३ हजार मिटरको उचाईमा रहेको सोलुदुधकुण्ड नगरपालिका र नेचासल्यान गाउँपालिकाको सिमानामा रहेको गौरिटापबाट विश्वको सर्वोच्च शिखर सगरमाथा लगायत दर्जनौ हिमाल नजिकबाट नियाल्न सकिन्छ । काठमाण्डौबाट २ सय ३० किलोमिटर दुरी पार गरेर गौरीटाप आएका विशिष्ट ब्यक्तिको टोलीलाई जिल्ला समन्वय समिति प्रमुख कृष्णप्रसाद निरौला, नेचासल्यान गाउँपालिका अध्यक्ष धनजन राई र उपाध्यक्ष विना राई लगायतले फुलमालाले स्वागत गरेका छन् । महानायक राजेश हमालले पत्ताले गौरिटाप क्षेत्र नेपालकै आकर्षक पर्यटकीय स्थलको रुपमा आफुल पाएको भन्दै सबैले आफ्नो देश एक पटक अनिवार्य घुम्नु पर्ने बताए । महानायक हमालले पर्यटन प्रवर्द्धन गर्न राज्यले ठोस नीति ल्याउनु पर्नेमा जोड दिए ।
क्याप्टेन विजय लामाले गाडीबाटै नउत्रीकनै सगरमाथा हिमाल देखिने गज्जबको ठाउँ रहेको भन्दै स्पार्क एडभेण्चरले पर्यटन प्रबर्धनमा योगदान पुर्याएको बताए । गायिका आनिछोईङ डोल्मा र गायक राजु लामाले पत्ताले गौरिटाप क्षेत्र अत्यन्तै रमणीय र सुन्दर भएको भन्दै नेपालीहरुलाई नजिकबाट सगरमाथा नियाल्ने छोटो गन्तब्य भएको बताए । स्पार्क कारका अध्यक्ष रोशन घिमिरेले वर्षेनी आन्तरिक पर्यटन प्रवर्द्धनका लागि कार्यक्रम गरिरहेकोमा यो पटक सोलुखुम्बु र ओखलढुङ्गाको लागि गरेको कार्यक्रममा उत्साहजनक सहभागिता रहेको बताए । नेचासल्यान गाउँपालिकाका अध्यक्ष धनजन राईले राष्ट्रिय स्तरका ख्यातिप्राप्त ब्यक्तिहरूको आगमनले पर्यटन व्यवसायमा ठूलो टेवा थपेको भन्दै गौरिटाप क्षेत्रको पर्यटकीय पूर्वाधार निर्माणमा स्थानीय सरकारले धेरै काम गरेको बताए ।
Discussion about this post