बुद्धजयन्तीको अवसरमा सोलुमा सुरु भयो सागादावा दौड फेस्टिभल, पहिलो दिन ४ सय ५० को सहभागिता 

बैशाख २७, सोलुखुम्बु । शाक्यमुनि भगवान गौतम बुद्धको २५ सय ६९ औ जन्मजयन्तीको अवसरमा आयोजित प्रथम अन्तराष्ट्रिय सागादावा दौड तथा कला सम्मेलन सुरु भएको छ ।  सोलुखुम्बुको सोलुदुधकुण्ड नगरपालिका ५ स्थित थेक्छेन पेमा छोलीङ गुम्बामा ३ दिवसीय सागादावा दौड तथा कला सम्मेलन सुरु भएको हो । गुम्बाको आयोजनामा हुने यस कार्यक्रमको पहिलो सेसन सामुदायिक दौड फन रन लगायत साँस्कृतिक फेसन सो लगायतका कार्यक्रम आज शनिबार सम्पन्न भएका छन् ।

सोलुदुधकुण्ड नगरपालिका लगायत दातृ निकायहरूको सहयोगमा हुने कार्यक्रममा हिमाली कालाहरूको प्रदर्शनीसँगै स्वास्थ्यका लागी खेलकुदको आयोजना हुने थेक्छेन पेमा छोलीङ गुम्बाका सचिव ङिमा तेण्डुप शेर्पाले बताउनुभयो ।  उहाँले हिमाली कला संस्कृतिहरुको संरक्षण गर्दै यहाँको संस्कृतिलाई पर्यटनसँग जोडन गुम्बा देखी गुम्बा सम्मको दौड अवधारणा सहित कार्यक्रमको सुरुवात गरिएको बताउनुभयो ।  आज पहिलो दिनको सामुदायिक फन रनमा स्थानीय समुदाय, विद्यार्थी, जनप्रतिनिधि, आयोजक लगायत करिव ४ सय ५० को हाराहारीमा दौडिएका थिए  ।

दौडनेमा सोलुदुधकुण्ड नगरपालिकाका नगरप्रमुख नाम्गेल जाङबु शेर्पा लगायत जनप्रतिनिधिहरू तथा स्थानीयको सहभागिता थियो । नगरप्रमुख शेर्पाले रेडियो एभरेष्टसँग कुरा गर्दै सँस्कृतिको संरक्षण गर्नु सबैको दायित्व भएको भन्दै यसलाई खेलसँग जोड्दा थप महत्व बढ्दै जाने उल्लेख गर्नुभयो । उहाँले दौडनु स्वास्थ्यका लागी समेत राम्रो भएकाले आफु समेत सहभागी भएर सहभागीहरूको मनोबल उच्च राख्न सकेको महसुस गरेको बताउनुभयो ।

उहाँले यस्ता किसिमका कार्यक्रमहरूले गर्दा समाजका भ्रातृत्व र भाइचारा कायम रहने भएकाले नगरपालिका सदैव यस्ता कार्यक्रमहरू प्रति सकारात्मक भएर सहयोग गरिरहेको उल्लेख गर्नुभयो । आइतबार ४२ किलोमिटर, २१ किलोमिटर तथा ११ किलोमिटर तर्फका दौड प्रतियोगिताहरू हुने र सोमबार बुद्धजयन्तीको अवसरमा विभिन्न साँस्कृतिक कार्यक्रमहरू हुने आयोजकले जनाएको छ ।