भ्यान दुर्घटनाबाट सामाजिक सञ्जालमा लोकप्रिय प्रहरी असई विरोध खतिवडाको मृत्यु 

बैशाख २७, सोलुखुम्बु । आफू चडेको भ्यान दुर्घटना हुँदा एक प्रहरी अधिकारीको मृत्यु भएको छ ।  सुनसरीको दुहबी नगरपालिका ३ फुटानी चौकस्थित पिकअप भ्यान दुर्घटना हुँदा त्रियुगा नगरपालिका ८ राजावास बस्ने ३० वर्षीय प्रहरी असई विरोध खतिवडाको मृत्यु भएको छ ।

जिल्ला प्रहरी कार्यालय सुनसरीका अनुसार शनिवार दिउसो ११ः५० बजेतिर इटहरी–विराटनगर सडक खण्डमा उत्तर इटहरीबाट दक्षिण विराटनगरतर्फ जाँदै गरेको प्र२–०१–००१च ०२५१ नम्बरको दाउरा बोकेको पिकअप भ्यान सडक किनारमा रहेको फलामको रेलिङमा ठोकिएर दुर्घटना भएको थियो । दुर्घटनाबाट टाउको, छाति तथा शरीरका विभिन्न भागमा चोट लागि गम्भीर घाइते भएका खतिवडालाई उद्धार गरी विराट टिचिङ हस्पिटल बिराटनगरमा उपचार गर्ने क्रममा १२ः२१ मिनेटमा चिकित्सकले मृत घोषणा गरेका थिए ।

मृतक खतिवडा जिल्ला प्रहरी कार्यालय उदयपुरमा कार्यरत थिए । उनी सामाजिक सञ्जालमा लोकप्रिय थिए । उक्त पिकअप भ्यानमा खतिवडा सँगै रहेका उदयपुर, चौदण्डीगढी नगरपालिका ६ बस्ने ३८ बर्षीय चालक सुरेश कार्की र चालकको १४ वर्षीय छोरी रोजिना कार्कीलाई छाति तथा टाउकोमा चोट लागेको छ। उनीहरूको अवस्था भने सामान्य रहेको प्रहरीले जनाएको छ ।