बडादशैँको पाँचौँ दिन आज स्कन्दमाताको पूजा आराधना गरिँदै

असोज २९, सोलुखुम्बु । बडादशैँअन्तर्गत नवरात्रको पाँचौँ दिन आज नवदुर्गामध्येकी पाँचौँ देवी स्कन्दमाताको विधिपूर्वक पूजा आराधना गरिँदै छ। प्रत्येक वर्ष आश्विन शुक्ल पञ्चमीका दिन दशैँघर तथा पूजा कोठामा स्कन्दमाताको पूजा आराधना गर्ने धार्मिक परम्परा रहेको छ। नवरात्रका अवसरमा घटस्थापना गरिएको स्थानमा दुर्गा सप्तशती चण्डी, श्रीमद्देवीभागवतलगायत देवी स्तोत्र पाठ गर्ने गरिन्छ।

वैदिक सनातन धर्मावलम्बीले शक्ति, ऐश्वर्य र विद्या प्राप्त हुने धार्मिक विश्वासका साथ नवरात्रका नौ दिनसम्म दुर्गा देवीको विशेष पूजा आराधना गर्ने गर्छन्। नवरात्रको पहिलो दिन असोज २५ गते विधिपूर्वक घटस्थापना गरी जौको जमरा राखिएको थियो। नवरात्रका नौ दिनमा क्रमशः शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्रि, महागौरी र सिद्धिदात्रीको पूजा आराधना गरिन्छ। यी नौ स्वरूपलाई नवदुर्गा भनिन्छ।

नवरात्रका अवसरमा देशभरका शक्तिपीठहरूमा पूजाआजा तथा दर्शन गर्ने भक्तजनको भीड लाग्ने गरेको छ। नौ दिनसम्म पूजा आराधना गरी तयार पारिएको जमरा र प्रसाद विजयादशमीदेखि कोजाग्रत पूर्णिमासम्म ग्रहण गर्ने परम्परा छ। यसरी नेपालीहरूले १५ दिनसम्म बडादशैँ पर्व मनाउने गर्छन्।