सावाकटहरेका अध्यक्ष राईले आफ्नो सुविधाबाट किनिदिए खानेपानीको पाइप  

बैशाख २६, सोलुखुम्बु । खोटाङको खोटेहाङ गाउँपालिकाका एक वडा अध्यक्षले सेवा सुविधाबाट खानेपानीको पाइप खरिद गरिदिएका छन् ।  गाउँपालिकाको वडा नम्बर ३ का अध्यक्ष जेफर राईले आफ्नो ४ महिना बराबरको तलब भत्ताबाट वडाको खानेपानीको समस्या समाधान  गर्न पाइप खरिद गरेर वितरण गरेका हुन ।

उहाँले सावाकटहरेको २ वटा टोलमा खडेरीको समयमा खानेपानीको समस्या हुनेभएकाले उक्त समस्या हल गर्न पाइप खरिद गरिएको बताउनुभयो ।  ४ महिनाको तलब भत्ता करिव ९० हजार रुपैयाँबाट उहाँले ३ हजार मिटर पाइप खरिद गरि वितरण गरिएको बताउनुभयो । राज्यले वडा अध्यक्षलाई दिने सेवा सुविधाबाट समेत नागरिकको समस्या हाल गर्ने उहाँको पूर्व घोषणा अनुरूप उक्त रकमलाई सामाजिक काममा लगाउँदै आउनुभएको छ ।

जनप्रतिनिधिको हैसियतमा उहाँले सरकारबाटै आउने योजना तथा विकासलाई समुचित ढङ्गले वितरण गरि काम गरिरहेको अवस्थामा आफ्नै सेवा सुविधाबाट समेत थप गरि नागरिकलाई सेवा दिइरहनुभएको भन्दै नागरिकले प्रशंसा गर्दै आएका छन् ।