असार १३, सोलुखुम्बु । सोलुखुम्बुको माप्य दुधकोशी गाउँपालिकामा “एकीकृत प्रारम्भिक बाल विकास योजना तर्जुमा कार्यशाला” सफलतापूर्वक सम्पन्न भएको छ । गाउँपालिकाको आयोजनामा, चाइल्ड नेटवर्क फाउन्डेशन र सेतो गुराँस राष्ट्रिय बाल विकास सेवाको सहकार्य तथा सहजीकरणमा भएको कार्यशाला शुक्रबार समापन भएको हो । “प्रारम्भिक बाल विकासको लगानी, दिगो राष्ट्रिय विकासको थालनी” तथा “गर्दै गरौं लगानी बाटो, कुलो, पुल, भवन र मन्दिरमा; थप गरौं लगानी प्रारम्भिक बाल विकासमा” भन्ने नारासहित कार्यशाला सञ्चालन गरिएको थियो । कार्यशालाको मुख्य उद्देश्य एकीकृत प्रारम्भिक बाल विकास (एलआईईसिडिपी) को अवधारणा बारे सरोकारवालाहरूलाई जानकारी गराउने, बाल्यकालको समग्र विकास सुनिश्चित गर्न योजना निर्माणमा स्थानीय तहको भूमिका स्पष्ट पार्ने, र बाल विकास क्षेत्रमा लगानी अभिवृद्धि गर्न प्रेरित गर्नु रहेको थियो ।
बाल विकास संयोजक रुमिला अधिकारीका अनुसार, कार्यशालाबाट शिक्षा, स्वास्थ्य, पोषण, सरसफाइ, कृषि तथा पशुपालन क्षेत्रलाई एकीकृत गर्दै ११ सदस्यीय विषयगत समिति गठन गरिएको छ । यस समितिले स्पष्ट अवधारणासहित आगामी नीति निर्माणमा योगदान पुर्याउनेछ । कार्यशालामा सेतो गुराँस राष्ट्रिय बाल विकास सेवाका जिल्ला कार्यक्रम अधिकृत झपट बहादुर बोहराले सहजीकरण गरेका थिए । कार्यशालाले आगामी आर्थिक वर्ष २०८२÷८३ का लागि करीब ७७ लाख रुपैयाँ बराबरको प्रारम्भिक बाल विकास योजनाको माग गर्न स्थानीय सरकार र सहकार्य संस्थालाई प्रतिबद्ध गराएको छ । कार्यक्रममा सहभागी ४० जना सरोकारवालाहरूले “गर्भावस्थादेखि ८ वर्षसम्मका बालबालिकाको सर्वोत्तम हित र सर्वाङ्गिण विकास सुनिश्चित गर्न” सक्रिय भूमिका निर्वाह गर्ने प्रतिबद्धता व्यक्त गर्दै हस्ताक्षर गरेका थिए । कार्यशालाको समापन गाउँपालिका अध्यक्ष बुद्धिकिरण राईको अध्यक्षतामा सम्पन्न भएको छ ।
अध्यक्ष राईले सेतो गुराँसको समन्वयमा पालिकामा शिक्षाको क्षेत्रमा देखिएको सकारात्मक परिवर्तनप्रति सन्तोष व्यक्त गर्दै, यस्ता कार्यक्रमहरूलाई अझ प्रभावकारी ढंगले कार्यान्वयन गर्न सुझाव दिएका थिए । कार्यशाला पछि पालिका अध्यक्ष र उपाध्यक्षको रोहवरमा समन्वय बैठक बसेर परियोजनाको प्रगति समिक्षा गरिएको र आगामी महिनाको योजना बनाई विद्यालयहरूको भौतिक पूर्वाधार र सिकाइ सुधारमा केन्द्रित हुँदै माचिङ बजेटमार्फत परियोजना कार्यान्वयन गर्ने प्रतिबद्धता पनि स्थानीय तहले जाहेर गरेको छ ।
उक्त कार्यक्रममा उपाध्यक्ष, पाँचै वडाका वडा अध्यक्षहरू, वडा सचिवहरू, प्रशासकीय अधिकृत गजेन्द्र भट्टराई, शिक्षा अधिकृत, पशु तथा कृषि शाखा प्रमुख, रिड नेपालका प्रतिनिधि, स्थानीय विद्यालयका प्रधानाध्यापक, बाल क्लब प्रतिनिधि, बाल विकास संयोजक, मेन्टर लगायतको उल्लेखनीय उपस्थिति थियो । यस कार्यशालालाई प्रारम्भिक बाल विकासका विषयलाई स्थानीय तहको नीति निर्माणमा स्थायी रूपमा समावेश गर्न गरिएको महत्त्वपूर्ण कदमका रूपमा लिइएको छ ।
Discussion about this post