१५औँ खुम्बु ल्होसार कप माघ २४ गतेदेखि सुरु हुने

माघ १३, सोलुखुम्बु । शेर्पा समुदायको सबैभन्दा ठूलो तथा प्रतिष्ठित फुटबल प्रतियोगिता खुम्बु ल्होसार कप–२०२६ यही माघ २४ गतेदेखि सुरु हुने भएको छ। यो प्रतियोगिता खुम्बु ल्होसार कपको १५औँ संस्करण हो। शेर्पा समुदायको प्रमुख पर्व ल्होसार (नयाँ वर्ष) को अवसर पारेर विगत १८ वर्षदेखि निरन्तर आयोजना हुँदै आएको यस प्रतियोगिताको १५औँ संस्करण महेन्द्र ज्योति एक्स–स्टुडेन्ट फोरम ले आयोजना गर्न लागेको हो।

मंगलबार काठमाडौंमा आयोजित पत्रकार सम्मेलनमा जानकारी दिँदै महेन्द्र ज्योति एक्स–स्टुडेन्ट फोरमका अध्यक्ष फर गरजे शेर्पा ले सोलुखुम्बुको खुम्बु पासाङल्हामु गाउँपालिकाका विभिन्न गाउँमा जन्मिएर हाल काठमाडौंमा बसोबास गरिरहेका शेर्पा युवाहरूले जाडोयामको फुर्सदिलो समय सदुपयोग गर्ने उद्देश्यले सन् २००९ मा ल्होसारको अवसरमा फुटबल प्रतियोगिता सुरु गरेको बताउनुभयो। उहाँका अनुसार प्रतियोगिताको मुख्य उद्देश्य शेर्पा युवाहरूमा खेलकुदप्रतिको रुचि बढाउनु, उनीहरूको प्रतिभा उजागर गर्नु र समुदायबीच एकता मजबुत बनाउनु हो।

साथै, प्रतियोगिताले प्रतिस्पर्धात्मक खेल वातावरण सिर्जना गर्दै फुटबल अभ्यासलाई प्रोत्साहन गर्ने लक्ष्य राखेको छ। यसअघि विभिन्न कारणले स्थगित हुँदै आएको खुम्बु ल्होसार कपको १५औँ संस्करण यसपटक माघ २४ गतेदेखि फागुन ३ गतेसम्म सञ्चालन हुनेछ। प्रतियोगिताका सबै खेलहरू सातदोबाटोस्थित एन्फा फुटबल मैदान मा हुनेछन्। हाल सहभागी टिमहरूले प्रशिक्षण सुरु गरिसकेको आयोजकले जनाएको छ। यस प्रतियोगितामा ८ वटा टिम सहभागी हुनेछन्।

अध्यक्ष शेर्पाका अनुसार वार्षिक रूपमा आयोजना हुँदै आएको खुम्बु ल्होसार कपले खुम्बु पासाङल्हामु गाउँपालिका भित्रका समुदायलाई फुटबलमार्फत एकताबद्ध गर्ने महत्वपूर्ण भूमिका खेल्दै आएको छ। ल्होसार पर्व र फुटबल उत्सव एकसाथ मनाइने यो प्रतियोगिता युवाहरू मात्र होइन, सम्पूर्ण समुदायका लागि साझा सांस्कृतिक तथा खेलकुद उत्सवका रूपमा स्थापित भइसकेको उहाँले बताउनुभयो।यसअघि सन् २००९ देखि सानो गाउँचन मैदानमा आयोजना हुँदै आएको प्रतियोगिता विभिन्न कारणले गर्दा सन् २०२५ मा आयोजना हुन सकेको थिएन। त्यसपछि आयोजकले यस वर्ष एन्फा मैदानमा प्रतियोगिता आयोजना गर्ने निर्णय गरेको हो।

खेलकुदमार्फत पर्यटन प्रवद्र्धन गर्ने उद्देश्यसहित खुम्बु क्षेत्रले खुम्बु ल्होसार कपलाई महत्वपूर्ण अभियानका रूपमा अघि बढाउँदै आएको अध्यक्ष शेर्पाले उल्लेख गर्नुभयो। आगामी दिनमा प्रतियोगितालाई अझ व्यवस्थित र स्तरयुक्त बनाउँदै लैजाने योजना पनि रहेको छ। खुम्बु ल्होसार कप–२०२६ को शीर्ष प्रायोजकका रूपमा १४ पिक्स एक्सपेडिसन रहेको छ भने सह–प्रायोजकमा हेली एभरेष्ट प्रा.लि. र खुम्बु पासाङल्हामु गाउँपालिका रहेका छन्। यसका साथै अन्य विभिन्न प्रायोजकहरूको समेत सहयोग रहेको आयोजकले जनाएको छ।