चौदण्डीगढी नगरपालिकाद्वारा खेलाडी तथा प्रशिक्षक सम्मान

माघ १३, सोलुखुम्बु । उदयपुरको चौदण्डीगढी नगरपालिका शिक्षा, युवा तथा खेलकुद शाखाद्वारा आयोजित खेलाडी सम्मान कार्यक्रममा अन्तर्राष्ट्रिय स्तरमा उत्कृष्ट प्रदर्शन गर्ने खेलाडी तथा प्रशिक्षकलाई सम्मान गरिएको छ । तेस्रो कालिम्पोङ अन्तर्राष्ट्रिय तेक्वान्दो च्याम्पियनसिप २०२५ मा नेपालको तर्फबाट सहभागी भई उत्कृष्ट नतिजा हासिल गर्न सफल प्रशिक्षक यशव राईलाई नगद ५ हजार रुपैयाँसहित सम्मान गरिएको हो ।

साथै, प्रतियोगितामा ४९ केजी मुनि प्रथम स्थान हासिल गर्ने खेलाडी सुहना राई, ५१ केजी मुनि प्रथम स्थान प्राप्त गर्ने खेलाडी सन्दिप साह र ३८ केजी मुनि द्वितीय स्थान हासिल गर्ने खेलाडी विपना राईलाई जनही १५ हजार रुपैयाँ नगदसहित सम्मान गरिएको छ । सम्मान कार्यक्रम नगरपालिकाका नगर प्रमुख कालुमान लामाको प्रमुख आतिथ्यतामा सम्पन्न भएको थियो ।

त्यसैगरी, उदयपुरको चौदण्डीगढी नगरपालिका वडा नम्बर ४ बसाहामा आयोजना हुँदै आएको नारदमुनि थुलुङ स्मृति गोल्डकप फुटबल प्रतियोगिताको एघारौँ संस्करणका अवसरमा आयोजक टिम बसाहा क्लबका खेलाडी तथा प्रशिक्षकहरूलाई समेत नगर प्रमुख कालुमान लामाले खादा लगाई शुभकामना व्यक्त गर्नुभएको छ ।

नगर प्रमुख लामाले खेलकुदले युवालाई अनुशासित, सक्षम र आत्मनिर्भर बनाउने उल्लेख गर्दै नगरपालिकाले आगामी दिनमा पनि खेलकुदको विकास र खेलाडीको प्रोत्साहनमा निरन्तर सहयोग गर्ने प्रतिबद्धता व्यक्त गर्नुभयो ।