बैशाख १४, सोलुखुम्बु । जिल्ला अस्पताल फाप्लुमा स्वास्थ्य क्षेत्रका लागि सामाजिक जवाफदेहिता सम्बन्धी आमभेला तथा प्रारम्भिक प्रतिवेदन प्रस्तुतीकरण कार्यक्रम सम्पन्न भएको छ । सोमबार आयोजित उक्त कार्यक्रम जिल्ला अस्पताल सोलुखुम्बु र सोलुदुधकुण्ड नगरपालिका वडा नं. ४ को आयोजनामा तथा वान स्टेप अहेड फाउण्डेशनको सहकार्यमा सम्पन्न गरिएको हो ।
कार्यक्रममा अस्पतालको वर्तमान अवस्थाको अवलोकन, सूचना संकलन, स्वास्थ्यकर्मीहरूसँग अन्तरक्रिया, सेवाग्राहीहरूको विवरण संकलन, सेवा लिएर फर्केका सेवाग्राहीसँगको अन्तर्वार्ता, महिला स्वास्थ्य स्वयंसेविका तथा समुदायका व्यक्तिहरूसँग छलफल, साथै प्रसुति सेवा लिएका आमाहरूसँग गरिएको अन्तर्वार्ताका निष्कर्ष प्रस्तुत गरिएको थियो । प्रस्तुत प्रतिवेदन अनुसार जिल्ला अस्पतालको समग्र कार्यसम्पादन मूल्यांकन गर्दा ८६ प्रतिशत प्रगति हासिल भएको देखिएको छ ।
गत आर्थिक वर्षमा स्वास्थ्य बीमा सेवामार्फत २ हजार ४ सय २५ जनाले उपचार सेवा लिएका थिए भने थप उपचारका लागि ६० जना बीमित सेवाग्राहीलाई अन्यत्र रेफर गरिएको तथ्यांक सार्वजनिक गरिएको छ । यसैगरी, बीमा कार्यक्रम अन्तर्गत १ हजार १ सय प्रकारका औषधी वितरण गरिएको जानकारी गराइएको छ । कार्यक्रममा अस्पतालमा भौतिक पूर्वाधार सुदृढ रहेको, स्वास्थ्यकर्मीहरूको क्षमता अभिवृद्धिका लागि तालिमहरू सञ्चालन भइरहेका, टेलिमेडिसिन सेवा उपलब्ध रहेको, कर्मचारी र व्यवस्थापनबीच सौहार्दपूर्ण सम्बन्ध रहेको उल्लेख गरिएको थियो ।
साथै, डेन्टल सर्जनसहितको दन्त सेवा, नियमित स्वास्थ्य सेवा प्रवाह, २४ सै घण्टा आकस्मिक सेवा, प्रयोगशाला, फार्मेसी तथा प्रसुति सेवा उपलब्ध रहेको र समय–समयमा स्वास्थ्य शिविर सञ्चालन हुने गरिएको जानकारी दिइएको छ । हाल जिल्ला अस्पतालमा ५२ जना स्वास्थ्यकर्मी कार्यरत रहेको र यहाँ विशेषगरी श्वासप्रश्वाससम्बन्धी तथा नसर्ने रोगका बिरामीहरू बढी आउने गरेको पनि कार्यक्रममा उल्लेख गरिएको छ ।
कार्यक्रममा बोल्दै अस्पताल व्यवस्थापन समितिका अध्यक्ष तथा जिल्ला समन्वय समितिका प्रमुख कृष्ण प्रसाद निरौलाले स्वास्थ्य सेवा केवल औषधीमा सीमित नभई मानवीय व्यवहार पनि उत्तिकै महत्वपूर्ण हुने बताउनुभयो । त्यसैगरी, जिल्ला अस्पताल फाप्लुका प्रमुख डा. विनेश कुमार मण्डलले स्वास्थ्य सेवा अझ प्रभावकारी बनाउन नीतिको प्रभावकारी कार्यान्वयन आवश्यक रहेकोमा जोड दिनुभयो ।
Discussion about this post