खोटाङमा पूर्वाधार आयोजनाको गुणस्तरमा निगरानी गर्न सर्वसाधारणलाई अपिल

बैशाख १४, सोलुखुम्बु । पुर्वाधार कार्यालय खोटाङ मार्फत सञ्चालन हुँने आयोजनाहरुको निगरानी गर्न सर्वसाधारणलाई अपिल गरिएको छ । कोशी प्रदेश सरकार अन्तर्गत भौतिक पूर्वाधार विकास मन्त्रालयको पूर्वाधार विकास निर्देशनालय, डिभिजन कार्यालय खोटाङले जिल्लामा सञ्चालनमा रहेका विकास आयोजनाको गुणस्तर निगरानीमा सहयोग गर्न सर्वसाधारणलाई अपिल गरेको हो । कार्यालयले एक सूचना जारी गर्दै आर्थिक वर्ष २०८२\८३ मा स्वीकृत विभिन्न विकास निर्माण आयोजनाहरू कार्यान्वयनको चरणमा रहेको जनाएको छ। हाल जिल्लामा १२३ वटा आयोजना निर्माणाधीन अवस्थामा रहेको कार्यालयको भनाइ छ ।

कार्यालयका अनुसार सीमित प्राविधिक जनशक्ति र स्रोतका कारण सबै आयोजनामा नियमित अनुगमन गर्न चुनौती भइरहेको भन्दै कार्यालयले सर्वसाधरणको सहयोग खोजेको हो । यस्तो अवस्थामा निर्माण कार्यको गुणस्तरमा कमी आउन नदिन स्थानीय उपभोक्ता, सरोकारवाला र सर्वसाधारणको सक्रिय सहभागिता आवश्यक रहेको उल्लेख गरिएको छ । सूचनामा निर्माण व्यवसायीहरूले सम्झौता अनुसार तोकिएको मापदण्ड र गुणस्तर कायम गरी काम सम्पन्न गर्नुपर्ने दायित्व रहेको पनि स्पष्ट पारिएको छ।

यदि कुनै आयोजनामा कमजोरी, लापरबाही वा गुणस्तरहीन काम भएको पाइएमा त्यसबारे प्रमाणसहित जानकारी गराउन कार्यालयले अनुरोध गरेको छ। कार्यालयले दिएको जानकारी अनुसार सर्वसाधारणले फोटो, भिडियोसहित ह्वाटसएपमा वा फोनमार्फत सूचना दिन सक्ने व्यवस्था गरिएको छ । प्राप्त गुनासोका आधारमा तत्काल अनुगमन गरी आवश्यक कारबाही गरिने कार्यालयले जनाएको छ। कार्यालयले यस पहलले निर्माण कार्यको पारदर्शिता, उत्तरदायित्व र गुणस्तर सुधारमा सहयोग पुग्ने विश्वास व्यक्त गरेको छ।