सोलुखुम्बुमा प्रहरी–पत्रकार अन्तरक्रिया, सूचना प्रवाह र सुरक्षामा सहकार्यको जोड

जेठ ११, सोलुखुम्बु । जिल्ला प्रहरी कार्यालय सोलुखुम्बुमा प्रमुख प्रहरी नायव उपरीक्षक नविन राजा बुढाथोकी र जिल्लास्थित सञ्चारकर्मीबीच भेटघाट तथा अन्तरक्रिया गरिएको छ। कार्यक्रममा प्रहरी र सञ्चार क्षेत्रबीचको समन्वय, सूचना प्रवाह तथा जिल्लाको शान्ति सुरक्षासम्बन्धी विषयमा छलफल गरिएको थियो। अन्तरक्रियामा प्रमुख प्रहरी नायव उपरीक्षक बुढाथोकीले जिल्लामा शान्ति सुरक्षा कायम गर्न प्रहरी सक्रिय रहेको बताउँदै तथ्यमा आधारित समाचार सम्प्रेषणका लागि सञ्चारकर्मीको भूमिका महत्त्वपूर्ण हुने धारणा राख्नुभयो।

उहाँले प्रहरी–पत्रकारबीचको सहकार्यले नागरिकमा सही सूचना प्रवाह गर्न सहयोग पुग्ने उल्लेख गर्नुभयो। कार्यक्रममा रेडियो एभरेस्ट का प्रबन्ध निर्देशक भानुभक्त निरौला ले जिल्लामा देखिएका विभिन्न समस्या समाधानका लागि प्रहरी र पत्रकारबीच सहकार्य आवश्यक रहेको बताउनुभयो। उहाँले स्थानीय मुद्दा र नागरिकका गुनासालाई सम्बन्धित निकायसम्म प्रभावकारी रूपमा पुर्‍याउन सञ्चारमाध्यम र प्रहरी दुवैले समन्वयात्मक भूमिका निर्वाह गर्नुपर्नेमा जोड दिनुभयो।

त्यसैगरी कार्यक्रममा उपस्थित पत्रकारहरूले जिल्लाका विभिन्न समस्या, सूचना प्रवाहमा देखिएका चुनौती तथा स्थानीय तहमा भइरहेका गतिविधिबारे प्रहरीलाई जानकारी गराएका थिए। उनीहरूले सत्य, निष्पक्ष र जिम्मेवार पत्रकारितामार्फत समाजमा सकारात्मक सन्देश प्रवाह गर्ने प्रतिबद्धता समेत व्यक्त गरेका थिए। भेटघाट कार्यक्रममा जिल्लाको सुरक्षा अवस्था, समुदाय–प्रहरी साझेदारी तथा सूचना आदानप्रदानलाई अझ प्रभावकारी बनाउने विषयमा समेत छलफल भएको जनाइएको छ।