कार्तिक १२, सोलुखुम्बु । उदयपुरको ताप्लि गाउँपालिका–रुपाटारस्थित ताप्लि अस्पतालमा एआई एक्सरेमार्फत छातीको एक्सरे तथा क्षयरोगको निःशुल्क जाँच शिविर सञ्चालन गर्ने तयारी गरिएको छ। शिविर सञ्चालनको तयारीस्वरूप बिहिबार स्वास्थ्य व्यवस्थापन समिति, सामुदायिक महिला स्वास्थ्य स्वयंसेविका तथा अन्य सरोकारवालाबीच छलफल कार्यक्रम सम्पन्न भएको छ।
भोलि कार्तिक १३ गते सञ्चालन हुने शिविरमार्फत लक्षित वर्ग तथा क्षयरोगका लक्षण देखिएका नागरिकलाई स्वास्थ्य सेवा प्रदान गरिने ताप्लि अस्पतालका डा। किसन घिमिरेले जानकारी दिनुभयो। ताप्लि गाउँपालिकाको आयोजना, स्वास्थ्य निर्देशनालय धनकुटा र बागमती सेवा समाजको प्राविधिक सहयोग तथा स्वास्थ्य कार्यालय उदयपुरको समन्वयमा शिविर सञ्चालन हुन लागेको हो।
शिविरमा क्षयरोगको निदान भई औषधि सेवन गरिरहेका व्यक्तिको सम्पर्कमा आएका नागरिक, श्वासप्रश्वाससम्बन्धी दीर्घरोगी, कुपोषित बालबालिका, ज्येष्ठ नागरिक, रोग प्रतिरोधात्मक क्षमता कमजोर भएका व्यक्ति, लागुऔषध सेवन गर्ने व्यक्ति, अङ्ग प्रत्यारोपण गरेका व्यक्ति तथा विभिन्न कलकारखानामा कार्यरत व्यक्तिलाई प्राथमिकतामा राखेर सेवा प्रदान गरिने जनाइएको छ।
त्यसैगरी, लामो समयसम्म लगातार खोकी लाग्ने, ज्वरो आउने, तौल घट्दै जाने, खानामा रुचि नहुने, छाती दुख्ने, खकारमा रगत देखिने तथा थकान महसुस हुनेजस्ता लक्षण भएका व्यक्तिले समेत शिविरबाट सेवा लिन सक्नेछन्। आयोजकका अनुसार गर्भवती महिला र क्षयरोगको उपचारमा रहेका व्यक्तिबाहेक १५ वर्षमाथिका नागरिक तथा क्षयरोगका बिरामीको सम्पर्कमा रहेका ५ देखि १४ वर्षसम्मका बालबालिकालाई शिविरमा समेटिनेछ।
शिविरमार्फत क्षयरोगको समयमै पहिचान, परीक्षण तथा उपचारमा पहुँच विस्तार गर्ने उद्देश्य राखिएको सहकर्मी ठविन्द्र मगरले जानकारी दिनुभयो।
Discussion about this post