दिप्रुङमा काठ ढुवानीका कारण सडक जर्जर, मर्मत गर्न गाउँपालिका र व्यवसायी बिच सहमति 

सोलुखुम्बु, साउन १२ ।  खोटाङको दिप्रुङ चुइचुम्मा गाउँपालिकामा काठ निकासी गर्ने व्यवसयाीका कारण सडक विग्रीएपछि सडक निर्माणका लागी तिनै ठेकेदारहरुसँग सहकार्य गरि मर्मत गरिने भएको छ ।  गाउँपालिका अध्यक्ष लोकेन्द्र राईको उपस्थितिमा बसेको एक बैठकले गाउँपालिका क्षेत्रभित्रका सडकहरू जर्जर भएपछि काठ व्यवसायीको सहयोगमा निर्माण गर्ने गरी सम्झौता गरेको हो । सोही अनुरूप गाउँपालिकाले सडक मर्मत तथा सञ्चालनलाई प्रभावकारी बनाउन व्यवसायीसँग सहमतिपत्रमा हस्ताक्षर गरेको गरेको छ ।

 गाउँपालिकाको कार्यालयमा मङ्गलबार भएको सहमतिअनुसार गाउँपालिकाले सडक मर्मतका लागि आवश्यक इन्धन, जेसिबी तथा अन्य उपकरण सञ्चालनका लागी आवश्यक व्यवस्थापन गर्नेछ । यसमा व्यवसायीले सडक मर्मतका लागी आवश्यक पर्ने ट्याक्टर उपलब्ध गराउनुपर्ने गरि सहमति भएको छ ।

तर मर्मत कार्यमा संलग्न चालक तथा कामदारको खाना–खाजाको खर्चसमेत गाउँपालिकाले नै व्यहोर्ने सहमति भएको छ । सडक मर्मत कार्यको नियमित अनुगमन गरि सञ्चालन योग्य बनेपछि सञ्चालनका लागि आवश्यक समन्वय र स्वीकृति प्रदान गर्ने गाउँपालिकाले जनाएको छ ।   मर्मत कार्य नसकिएसम्म गाउँपालिका क्षेत्र भित्र काठ ढुवानी बन्द गरिएको पनि गाउँपालिकाले जनाएको छ   ।

काठजन्य व्यवसायीले मनसुनको समयमा काठको ओसारपसार गर्दा जिल्लाका प्रायः सबै स्थानीय तहका सडकको अवस्था जर्जर बनेको छ ।  दक्षिणी बेल्ट बराहपोखरी देखी उत्तरी बेल्ट ऐसेलुखर्क गाउँपालिका गरि १० ओटै स्थानीय तहका सडकहरू मनसुनको समयमा हुने काठ ढुवानीका कारण धराशायी बन्ने गरेका छन् ।