खोटाङमा ट्याक्टर दुर्घटना हुँदा एक बालकको मृत्यु, १९ घाइते

भदौ १२, सोलुखुम्बु । खोटाङको दिक्तेल रुपाकोट मझुवागढी नगरपालिका–२ छेपेखोलास्थित मध्यपहाडी लोकमार्गमा शुक्रबार ट्याक्टर दुर्घटना हुँदा एक बालकको मृत्यु भएको छ भने १९ जना घाइते भएका छन् । भुलभुलेबाट दिक्तेलतर्फ आउँदै गरेको ना ५ त ४५५५ नम्बरको ट्याक्टर आफैँ अनियन्त्रित भई दुर्घटना हुँदा ट्याक्टरमा सवार २० जना घाइते भएको जिल्ला प्रहरी कार्यालय खोटाङले जनाएको छ ।

दुर्घटनामा दिक्तेल रुपाकोट मझुवागढी नगरपालिका–५ लफ्याङका १४ वर्षीय दिवश परियारको उपचारका लागि लैजाने क्रममा मृत्यु भएको प्रहरीले जनाएको छ । उहाँको शव जिल्ला अस्पताल दिक्तेलमा राखिएको छ । दुर्घटनामा ४५ वर्षीय सबिन तिरुवा, नौ वर्षीय योनिस विक, ३५ वर्षीया बिमला विकलगायत गम्भीर घाइते भएका छन् ।

उनीहरूको जिल्ला अस्पताल दिक्तेलमा सामान्य उपचारपछि थप उपचारका लागि काठमाडौं रेफर गरिएको प्रहरीले जनाएको छ । यस्तै, ३० वर्षीय लिला श्रेष्ठ, ५७ वर्षीया लुलादेवी विक, ५० वर्षीय राजन विक, ५१ वर्षीय रामबहादुर विक, ३४ वर्षीय सिताराम विक, १८ वर्षीय मन्दिप तिरुवा, २३ वर्षीय नबिन परियार, १२ वर्षीय न्युकेश तिरुवा, ३५ वर्षीय बुडिराम विक, २१ वर्षीया मनिका परियार, ४० वर्षीया बिना परियार, १४ वर्षीया दिपसना परियार, १८ वर्षीया निशा परियार, १७ वर्षीया चन्द्रकला विक, १७ वर्षीय प्रबिन विक र १६ वर्षीय युकेश तिरुवा घाइते भएका छन् ।

उनीहरू सबैको अवस्था मध्यम रहेको प्रहरीले जनाएको छ । घाइते सबैलाई थप उपचारका लागि काठमाडौं रेफर गरिएको छ । दुर्घटनापछि ट्याक्टर घटनास्थलमै रहेको र उठाउने पहल भइरहेको प्रहरीले जनाएको छ । दुर्घटनाका कारण मध्यपहाडी लोकमार्गमा यातायात अवरुद्ध नभएको बताइएको छ । ट्याक्टर चालक ओखलढुङ्गाको सिद्धिचरण नगरपालिका–७ का २३ वर्षीय रिनिमा शेर्पालाई प्रहरीले नियन्त्रणमा लिएको छ ।

दुर्घटनाको थप अनुसन्धान भइरहेको जिल्ला प्रहरी कार्यालय खोटाङले जनाएको छ । घटनास्थल जिल्ला प्रहरी कार्यालय खोटाङबाट करिब छ किलोमिटर उत्तरपूर्वमा पर्छ । प्रहरी निरीक्षक निराजन बस्नेतको कमान्डमा १० जनाको प्रहरी टोली घटनास्थलमा खटिएको थियो ।