सोलुखुम्बुमा दशैँ–तिहार विशेष ब्याडमिन्टन प्रतियोगिता सुरु, विजेतालाई ५ हजार पुरस्कार

असोज २४, सोलुखुम्बु । दशैँ–तिहारको अवसरमा सोलुखुम्बुको सदरमुकाम सल्लेरीमा खुला ब्याडमिन्टन प्रतियोगिता सुरु भएको छ। जिल्ला प्रशासन कार्यालय सोलुखुम्बुको आयोजनामा शनिबारदेखि दोर्पुस्थित कभर्डहलमा प्रतियोगिता सुरु भएको हो । प्रतियोगितामा करिब ४० टिमको सहभागिता रहेको छ।

चाडपर्वको अवसरमा खेलकुदमार्फत आपसी सद्भाव, भाइचारा र स्वस्थ प्रतिस्पर्धाको भावना विकास गर्ने उद्देश्यले प्रतियोगिता आयोजना गरिएको आयोजकले जनाएको छ । प्रतियोगितामा प्रथम हुने टिमले नगद पाँच हजार रुपैयाँसहित ट्रफी, मेडल र प्रमाणपत्र प्राप्त गर्नेछ। यसैगरी द्वितीय हुने टिमले तीन हजार रुपैयाँ तथा तृतीय हुने दुई टिमले जनही एक हजार पाँच सय रुपैयाँसहित ट्रफी, मेडल र प्रमाणपत्र प्राप्त गर्नेछन् ।

प्रतियोगिता सम्पन्न गर्न सोलुखुम्बु जिल्ला ब्याडमिन्टन संघले प्राविधिक सहयोग गर्नेछ भने व्यवस्थापनको जिम्मेवारी योङ स्टार क्लब, सोलुखुम्बुले लिएको छ । कर्मचारी मिलन केन्द्र, सोलुखुम्बु प्रतियोगिताको सहप्रायोजक रहेको आयोजकले जनाएको छ । प्रतियोगितामा जिल्ला प्रशासन कार्यालयका प्रमुख जिल्ला अधिकारीदेखि जिल्लामा कार्यरत उच्चपदस्थ सरकारी कर्मचारी तथा अन्य खेलाडीको सहभागिता रहेको जिल्ला ब्याडमिन्टन संघ सोलुखुम्बुका सचिव अर्जुन श्रेष्ठले जानकारी दिनुभयो।

प्रतियोगिता दुई दिनसम्म सञ्चालन हुने अपेक्षा गरिएको उहाँले बताउनुभयो । चाडपर्वका बेला आयोजना गरिएको प्रतियोगिताले जिल्लामा खेलकुद गतिविधिलाई प्रोत्साहन गर्नुका साथै सरकारी कर्मचारी र स्थानीय खेलाडीबीच आपसी सम्बन्ध, सहकार्य र सद्भाव अभिवृद्धि गर्ने अपेक्षा गरिएको छ।