विश्व हुलाक दिवस : सोलुखुम्बुमा हाजिरीजवाफ प्रतियोगिता

असोज २३, सोलुखुम्बु । सोलुखुम्बुमा हुलाक सेवामार्फत पठाइएका चिठी तथा सामग्रीको अवस्थाबारे सेवाग्राहीलाई जानकारी दिने पिआइटिएस प्रणाली विस्तार गरिनुका साथै अन्तरमावि स्तरीय हाजिरीजवाफ प्रतियोगिता आयोजना गरी १५२औँ विश्व हुलाक दिवस मनाइएको छ । विश्व हुलाक दिवसको अवसरमा शुक्रबार जिल्ला हुलाक कार्यालय सोलुखुम्बुले महाकुलुङ गाउँपालिकामा पिआइटिएस प्रणाली स्थापना गरेको हो ।

यसै अवसरमा सोताङ र महाकुलुङका माध्यमिक विद्यालयका विद्यार्थी सहभागी गराई जिल्लामै पहिलोपटक हुलाक सेवाअन्तर्गत अन्तरमावि स्तरीय हाजिरीजवाफ प्रतियोगितासमेत आयोजना गरिएको कार्यालयले जनाएको छ ।जिल्ला हुलाक कार्यालय सोलुखुम्बुका निमित्त हुलाक अधिकृत शोभा नेपालका अनुसार महाकुलुङ गाउँपालिकाको केन्द्र बुङस्थित सगरमाथा माध्यमिक विद्यालयमा आयोजित प्रतियोगितामा पाँचवटा माध्यमिक विद्यालयको सहभागिता रहेको थियो ।

प्रतियोगितामा सगरमाथा माध्यमिक विद्यालय प्रथम, सोताङ माध्यमिक विद्यालय द्वितीय र वीरेन्द्र ज्योति माध्यमिक विद्यालय तृतीय भएका छन् । प्रतियोगितामा प्रथम, द्वितीय र तृतीय हुने विद्यालयलाई क्रमशः पाँच हजार, तीन हजार र दुई हजार रुपैयाँसहित प्रमाणपत्र प्रदान गरिएको निमित्त हुलाक अधिकृत नेपालले जानकारी दिनुभयो । हुलाक सेवालाई परम्परागत चिठीपत्र आदानप्रदानमा मात्र सीमित नराखी प्रविधिमैत्री तथा सेवाग्राहीमैत्री बनाउने उद्देश्यले पिआइटिएस प्रणाली विस्तार गरिएको कार्यालयले जनाएको छ ।

यस प्रणालीमार्फत सेवाग्राहीले हुलाकबाट पठाएका चिठी तथा सामग्री कहाँ पुगेका छन् भन्ने जानकारी सहज रूपमा प्राप्त गर्न सक्नेछन् । कार्यालयका अनुसार सोलुदूधकुण्ड नगरपालिका, महाकुलुङ, माप्य दूधकोशी र थुलुङ दूधकोशी गाउँपालिकामा प्रणाली सञ्चालनमा ल्याइसकिएको छ । जिल्लाका अन्य स्थानीय तहमा समेत सेवा विस्तार गर्ने तयारी भइरहेको छ ।

यसैगरी, विश्व हुलाक दिवसको अवसरमा कार्यालयले उत्कृष्ट कर्मचारी तथा हुलाक सेवा बढी उपयोग गर्ने सेवाग्राहीलाई सम्मान गरेको छ । महाकुलुङ गाउँपालिका अध्यक्ष सूर्यबहादुर कुलुङको प्रमुख आतिथ्यतामा कार्यक्रम सम्पन्न भएको हो ।