बालबालिका र अभिभावकलाई खेलमार्फत जोड्दै ह्वाइट हिल्स स्कुल

असोज २५, सोलुखुम्बु । सोलुखुम्बुको सदरमुकाम सल्लेरीस्थित ह्वाइट हिल्स इङ्लिस सेकेन्डरी बोर्डिङ स्कुलले अभिभावक र बालबालिकाबीचको सम्बन्ध प्रगाढ बनाउने उद्देश्यले चिल्ड्रेन, प्यारेन्ट्स गेम एन्ड स्पोट्र्स कार्यक्रम आयोजना गरेको छ । विद्यालयले घटस्थापनाका दिन आइतबार तान्त्रिक झाँक्री प्रकाश भुजेलको प्रमुख आतिथ्यतामा कार्यक्रम आयोजना गरेको हो । कार्यक्रममा बालबालिका तथा अभिभावकका लागि भलिबल प्रतियोगितालगायत विभिन्न खेलकुद गतिविधि सञ्चालन गरिएको थियो ।

कार्यक्रममा विद्यालयका प्रिन्सिपल सन्तोष सुब्बाले व्यस्त दिनचर्याका कारण अभिभावक र बालबालिकाबीच संवाद तथा अन्तरक्रिया घट्दै गएको अवस्थामा खेलकुदका माध्यमबाट आपसी सम्बन्धलाई थप सुमधुर बनाउन कार्यक्रम आयोजना गरिएको बताउनुभयो । खेलकुदले अभिभावक र बालबालिकालाई एकै ठाउँमा सहभागी गराई आपसी आत्मीयता बढाउनुका साथै पारिवारिक सम्बन्धलाई थप बलियो बनाउने विश्वास लिइएको उहाँको भनाइ थियो ।

कार्यक्रमका प्रमुख अतिथि तान्त्रिक झाँक्री प्रकाश भुजेलले विद्यालयको निमन्त्रणामा कार्यक्रममा सहभागी हुन पाएकोमा खुसी व्यक्त गर्दै विद्यालय परिवारप्रति आभार प्रकट गर्नुभयो । सो अवसरमा भुजेलले विद्यालयलाई खेलकुद सामग्री तथा नगद सहयोगसमेत प्रदान गर्नुभएको विद्यालयले जनाएको छ । विद्यालयले उहाँबाट प्राप्त सहयोगप्रति आभार व्यक्त गरेको छ ।