दसैँमा खानपानमा ध्यान दिन र नियमित औषधि सेवन गर्न चिकित्सकको सुझाव

कार्तिक १, सोलुखुम्बु । बडादसैँ, तिहार, नेपाल संवत् तथा छठजस्ता चाडपर्व मनाउने क्रममा खानपानमा विशेष ध्यान दिन र दीर्घरोगीले नियमित औषधि सेवन गर्न चिकित्सकले सुझाव दिएका छन् । जिल्ला अस्पताल फाप्लुका निमित्त मेडिकल सुपरिटेन्डेन्ट डा. विनेश कुमार मण्डलले चाडपर्वका समयमा आवश्यकताभन्दा बढी चिल्लो, बोसोयुक्त, गुलियो तथा उच्च कार्बोहाइड्रेटयुक्त खानेकुरा सेवन गर्दा स्वास्थ्यमा प्रतिकूल असर पर्न सक्ने बताउनुभयो । उहाँले सन्तुलित आहार, ताजा खाना र पर्याप्त मात्रामा सागसब्जी तथा फलफूल सेवन गर्नुपर्नेमा जोड दिनुभयो । चाडपर्वका समयमा मासु, मिठाई तथा अन्य परिकारको बढी सेवन गर्ने प्रवृत्तिले मधुमेह, उच्च रक्तचाप र कोलेस्ट्रोलको समस्या भएका व्यक्तिलाई थप जोखिममा पार्न सक्ने उहाँको भनाइ छ ।

विशेषगरी मधुमेहका बिरामीमा चाडपर्वपछि रगतमा चिनीको मात्रा बढ्ने समस्या देखिन सक्ने भएकाले खानपानमा सावधानी अपनाउनुपर्ने उहाँले बताउनुभयो । डा. मण्डलका अनुसार कार्बोनेटेड पेय पदार्थ तथा अत्यधिक गुलियो भएका पेयको सेवनले पनि स्वास्थ्यमा नकारात्मक असर पार्न सक्छ । मासु तथा अन्य परिकारसँग यस्ता पेय पदार्थको अत्यधिक सेवन गर्ने बानीले विशेषगरी मधुमेह तथा अन्य दीर्घरोग भएका व्यक्तिको स्वास्थ्यमा थप जटिलता निम्त्याउन सक्ने उहाँले बताउनुभयो । उच्च रक्तचाप, मधुमेह तथा कोलेस्ट्रोलका बिरामीले चाडपर्वका समयमा पनि नियमित औषधि सेवन गर्नुपर्ने उहाँको सुझाव छ ।

रक्तचापका बिरामीले समय–समयमा रक्तचाप जाँच गराउनुपर्ने र मधुमेहका बिरामीले मिठाई तथा अन्य गुलियो पदार्थको सेवन सीमित गर्नुपर्ने उहाँले बताउनुभयो । कुनै असामान्य लक्षण देखिएमा तत्काल स्वास्थ्य संस्थामा सम्पर्क गर्न पनि उहाँले आग्रह गर्नुभयो । चाडपर्वमा मासु भण्डारण गर्दा पनि विशेष सावधानी अपनाउनुपर्ने चिकित्सकको सुझाव छ । मासुलाई लामो समयसम्म भुटेर राख्नुभन्दा उचित तापक्रममा फ्रिजमा सुरक्षित राख्नु र सम्भव भएसम्म ताजा तथा राम्ररी पकाएको खाना खानु उपयुक्त हुने उहाँले बताउनुभयो । तर, फ्रिजमा राख्दैमा खाना पूर्ण रूपमा सुरक्षित नहुने भएकाले भण्डारण र पकाउने तरिकामा ध्यान दिनुपर्ने उहाँको भनाइ छ । बजारबाट खरिद गरिने मिठाई तथा अन्य खाद्यवस्तुको गुणस्तरमा समेत ध्यान दिनुपर्ने उहाँले बताउनुभयो । खाद्यवस्तुलाई आकर्षक बनाउन प्रयोग गरिने अस्वस्थकर रसायन तथा अन्य पदार्थले स्वास्थ्यमा जोखिम निम्त्याउन सक्ने भएकाले सकेसम्म घरमै तयार पारिएको ताजा खाना सेवन गर्नु उचित हुने उहाँले उल्लेख गर्नुभयो ।

चाडपर्वका समयमा स्वास्थ्यमा समस्या देखिएपछि मात्र अस्पताल जाने प्रवृत्ति त्याग्नुपर्नेमा जोड दिँदै डा. मण्डलले नियमित स्वास्थ्य परीक्षणको महत्त्वसमेत औँल्याउनुभयो । समयमै रोग पहिचान गरी उपचार गराउन सके सम्भावित जटिलता कम गर्न सकिने उहाँको भनाइ छ । यसैबीच, दसैँलगायत चाडपर्वका समयमा पनि जिल्ला अस्पताल फाप्लुको स्वास्थ्य सेवा नियमित सञ्चालन हुने अस्पतालले जनाएको छ ।

अस्पतालमा आकस्मिक सेवा, वार्ड सेवा तथा आवश्यकताअनुसार आकस्मिक शल्यक्रिया सेवा निरन्तर उपलब्ध हुने डा। मण्डलले जानकारी दिनुभयो । चाडपर्वका समयमा सेवा प्रभावित हुन नदिन मेडिकल अधिकृतदेखि विशेषज्ञ चिकित्सकसम्मको ड्युटी तालिका मिलाइएको र आवश्यक औषधिको व्यवस्थापनमा समेत ध्यान दिइएको उहाँले बताउनुभयो । आकस्मिक उपचारका लागि औषधिको अभाव हुन नदिन अस्पतालले एक महिनाअघिदेखि नै तयारी गरेको उहाँको भनाइ छ ।