सिन्धुली सुमो दुर्घटनामा मृत्यु भएका तीनै जनाको पहिचान खुल्यो

कार्तिक १, सोलुखुम्बु । सिन्धुलीको फिक्कल गाउँपालिका–६ नागथानस्थित मध्यपहाडी लोकमार्गबाट सुनकोसी नदीमा सुमो खस्दा मृत्यु भएका तीनै जनाको पहिचान खुलेको छ । दुर्घटनामा चार जना घाइते भएका छन् भने तीन जना बेपत्ता भएका छन् । काठमाडौंबाट दसैँ मनाउन खोटाङ घर फर्कँदै गरेका यात्रु सवार को १ ज २९७६ नम्बरको सुमो गएराति २ः३० बजे सडकबाट करिब १५० मिटर तल सुनकोसी नदीमा खसेको थियो ।

दुर्घटनामा परी दिक्तेल रूपाकोट मझुवागढी नगरपालिका–५ लफ्याङ दुभेकी २१ वर्षीया युपना राई र १९ वर्षीया काब्या राई तथा खोटेहाङ गाउँपालिका–६ इन्द्रेणीपोखरी घर भई दिक्तेल बस्दै आएकी १६ वर्षीया स्वस्तिका विश्वकर्माको मृत्यु भएको हो । गाडीमा चालकसहित १० जना सवार रहेकामा चार जना घाइते भएका छन् । घाइते हुनेमा ओखलढुङ्गाको सिद्धिचरण नगरपालिका–२ का २९ वर्षीय चालक आशिष विश्वकर्मा, खोटाङको दिक्तेल रूपाकोट मझुवागढी नगरपालिका–३ की ३८ वर्षीया सम्झना राई, उनकी १२ वर्षीया छोरी शिवानी राई र मृतक स्वस्तिकाका १३ वर्षीय भाइ अंकित विश्वकर्मा रहेका छन् ।

घाइते सम्झनालाई हेलिकोप्टरमार्फत काठमाडौँ लगिएको छ भने अन्य तीन जनाको सिन्धुली जिल्ला अस्पतालमा उपचार भइरहेको जिल्ला प्रहरी कार्यालय खोटाङका सूचना अधिकारी निराजन बस्नेतले जानकारी दिनुभयो । दुर्घटनामा बेपत्ता भएकाहरूको खोजी कार्य जारी रहेको प्रहरीले जनाएको छ । उनीहरूको खोजीका लागि गोताखोर टोलीसमेत परिचालन गरिएको छ । बेपत्ता भएकाहरूको पहिचान खुल्न नसकेको जिल्ला प्रहरी कार्यालय खोटाङका प्रहरी नायब उपरीक्षक प्रकाश बुढाथोकीले बताउनुभयो ।