खोटाङमा दसैँ–तिहार, चेलीलाई उपहार’ अभियानले यस वर्ष पनि निरन्तरता पाउने

कार्तिक २, सोलुखुम्बु । खोटाङमा क्रियाशील युवाको एक समूहले दसैँ–तिहारका अवसरमा आर्थिक अवस्था कमजोर भएका तथा यातायात सेवाको पहुँचबाट टाढा रहेका चेलीलाई लक्षित गरी ‘दसैँ–तिहार, चेलीलाई उपहार अभियान–२०८३’ सञ्चालन गर्ने भएको छ । चाडपर्वका समयमा चेलीलाई माइतीघर आउन तथा चाडपर्व मनाएर पुनः कर्मघर फर्कन सहज होस् भन्ने उद्देश्यले अभियान सञ्चालन गर्न लागिएको हो । समूहले विगत तीन वर्षदेखि यस्तो अभियान सञ्चालन गर्दै आएको छ ।

अभियानका संयोजक सञ्जयकुमार राईका अनुसार दसैँका अवसरमा कात्तिक ३ देखि ६ गतेसम्म र तिहारका अवसरमा कात्तिक २४ देखि २६ गतेसम्म निःशुल्क यातायात सेवा उपलब्ध गराउने तयारी गरिएको छ । अभियानमा महिला, बालबालिका, ज्येष्ठ नागरिक तथा अपाङ्गता भएका व्यक्तिलाई विशेष प्राथमिकता दिइनेछ । आवश्यकताअनुसार पुरुषलाई पनि सेवा प्रदान गरिने संयोजक राईले जानकारी दिनुभयो । अभियानमा सहभागी हुन हालसम्म ३५ जना युवाले नाम दर्ता गराएका छन् । स्वयम्सेवामा सहभागी हुन इच्छुक युवाको सङ्ख्या थपिने क्रम जारी रहेको उहाँले बताउनुभयो ।

मध्यपहाडी लोकमार्ग, सगरमाथा राष्ट्रिय राजमार्गका विभिन्न सडकखण्ड तथा जिल्लाका ग्रामीण सडकमा ३५ किलोमिटर दूरीसम्म निःशुल्क यातायात सेवा उपलब्ध गराउने योजना रहेको छ । अभियानबाट सेवा लिन चाहने व्यक्तिले पनि आफ्नो विवरण टिपाउन थालेका छन् । सुरुमा विवरण दर्ता गराउनेलाई प्राथमिकताका आधारमा सेवा उपलब्ध गराइने जनाइएको छ । निःशुल्क यातायात सेवा लिन चाहने यात्रुले बढीमा पाँच किलोग्राम तौलसम्मका झोला मात्र साथमा राख्न पाउनेछन् ।

जिल्लाका अधिकांश सडक कच्ची अवस्थामा रहेकाले सम्भावित दुर्घटनाको जोखिम न्यूनीकरण गर्न यात्रुले बोक्न पाउने सामानको तौल निर्धारण गरिएको संयोजक राईले बताउनुभयो । समूहले यसअघि २०८१ सालमा ३४५ जना र २०८२ सालमा ७०० जनालाई निःशुल्क यातायात सेवा प्रदान गरेको थियो । शुभेच्छुकको आर्थिक तथा प्राविधिक सहयोगमा सञ्चालन हुँदै आएको अभियानका लागि एकपटकमा करिब चार लाख रुपैयाँ खर्च हुने गरेको जनाइएको छ ।