सोलुखुम्बुको माथिल्लो भेगमा हिमपात, पर्यटकलाई सुरक्षित स्थानमै रहन आग्रह

कार्तिक १३, सोलुखुम्बु । सोलुखुम्बुको माथिल्लो भेगमा हिमपात भइरहेको छ । जिल्लाको खुम्बु क्षेत्रअन्तर्गत डिङ्बुचे, लोबुचे, गोक्यो तथा खुम्जुङ आसपासका क्षेत्रमा हिमपात भइरहेको जिल्ला प्रहरी कार्यालय सोलुखुम्बुले जनाएको छ । जिल्ला प्रहरी कार्यालय सोलुखुम्बुका प्रहरी नायब उपरीक्षक (डीएसपी) नवीन राजा बुढाथोकीका अनुसार डिङ्बुचेभन्दा माथिल्लो क्षेत्रमा एक फिटभन्दा बढी हिमपात भइसकेको छ ।

हिमपात भइरहे पनि हालसम्म जिल्लाभर कुनै पनि सडक अवरुद्ध भएको जानकारी प्राप्त नभएको प्रहरीले जनाएको । माथिल्लो भेगमा रहेका पर्यटकहरूलाई सुरक्षित स्थानमा बस्न तथा मौसमको अवस्था सामान्य नभएसम्म अनावश्यक आवतजावत नगर्न आग्रह गरिएको छ ।

डीएसपी बुढाथोकीका अनुसार हालसम्म हिमपातका कारण जिल्लामा कुनै पनि मानवीय वा भौतिक क्षति भएको विवरण प्राप्त भएको छैन । मौसमको अवस्था र सम्भावित जोखिमलाई मध्यनजर गर्दै पर्यटक तथा स्थानीय बासिन्दालाई सतर्क र सुरक्षित रहन प्रहरीले आग्रह गरेको छ।