कोशी प्रदेशका १८ सामुदायिक विद्यालयमा आधुनिक पूर्वाधार विस्तार हुँदै

कार्तिक १३, सोलुखुम्बु । कोशी प्रदेशका १८ वटा सामुदायिक विद्यालय आधुनिक भौतिक पूर्वाधार विस्तारको योजनामा छनोटमा परेका छन्। देशभरका दुई हजारभन्दा बढी विद्यार्थी अध्ययनरत १०९ वटा सामुदायिक विद्यालयलाई प्राथमिकतामा राख्दै सरकारले ल्याएको योजनाअन्तर्गत कोशी प्रदेशका विद्यालयमा पनि आधुनिक भवन, प्रयोगशाला तथा पुस्तकालय निर्माण हुने भएको छ। शिक्षा तथा खेलकुद मन्त्रालयले देशभरका १०९ वटा विद्यालयको भौतिक संरचना सुदृढीकरणका लागि कुल ६ अर्ब ५४ करोड रुपैयाँ बजेट विनियोजन गरेको छ।

जसमध्ये पहिलो चरणमा ८९ वटा विद्यालय पहिचान गरी ५ अर्ब ३४ करोड रुपैयाँ निकासा भइसकेको जनाइएको छ। शिक्षामन्त्री सस्मित पोखरेलका अनुसार प्रतिविद्यालय करिब ६ करोड रुपैयाँ लागतमा आधुनिक १२ कोठे तीनतले भवन, अत्याधुनिक प्रयोगशाला र समृद्ध पुस्तकालय निर्माण गर्ने गरी योजना अघि बढाइएको छ। योजनाअन्तर्गत कोशी प्रदेशका उदयपुर, झापा, ताप्लेजुङ, पाँचथर, मोरङ र सुनसरीका विद्यालय छनोटमा परेका छन्।

उदयपुरबाट त्रियुगा नमुना माध्यमिक विद्यालय र त्रिवेणी माध्यमिक विद्यालय छनोट भएका छन् । यस्तै, झापाबाट धुलाबारी माध्यमिक विद्यालय, हिमालय माध्यमिक विद्यालय, देवी माध्यमिक विद्यालय, महेन्द्ररत्न माध्यमिक विद्यालय, कन्काई माध्यमिक विद्यालय र मोहनमाया माध्यमिक विद्यालय छनोटमा परेका छन्। यसैगरी ताप्लेजुङको भानु माध्यमिक विद्यालय र पाँचथरको फिदिम माध्यमिक विद्यालय पनि योजनामा समेटिएका छन्।

मोरङका साजीलाल माध्यमिक विद्यालय, राधिका माध्यमिक विद्यालय, पञ्चायत माध्यमिक विद्यालय, सुकुना माध्यमिक विद्यालय, पोखरिया माध्यमिक विद्यालय र आदर्श माध्यमिक विद्यालय छनोटमा परेका छन्। सुनसरीका जगन्नाथ डेडराज जनता माध्यमिक विद्यालय र पब्लिक हाई स्कुल पनि योजनामा समावेश भएका छन्। विद्यालयमा आधुनिक भौतिक पूर्वाधार, प्रयोगशाला र पुस्तकालयको विस्तारसँगै विद्यार्थीको सिकाइ वातावरण सुधार हुनुका साथै सामुदायिक विद्यालयको शैक्षिक गुणस्तर अभिवृद्धिमा सहयोग पुग्ने अपेक्षा गरिएको छ ।