सबिना राई, सोलुखुम्बु । ओखलढुङ्गाको मानेभञ्ज्याङ गाउँपालिका–७ स्थित टोक्सेलमा कोशी प्रदेशस्तरीय प्रादेशिक अस्पताल निर्माणको माग राख्दै आन्दोलनरत सङ्घर्ष समिति र कोशी प्रदेश स्वास्थ्य मन्त्रालयबिच पाँच बुँदे सहमति भएको छ । मंगलबार दुई पक्षबिच सहमति भएसँगै सङ्घर्ष समितिले आमरण अनशनलगायतका आन्दोलनका कार्यक्रम स्थगन गर्ने निर्णय गरेको छ भने प्रदेश सरकार अस्पताल निर्माण प्रक्रिया अघि बढाउन तयार भएको छ । सहमति पत्रमा सङ्घर्ष समितिका संयोजक माधवप्रसाद ढुङ्गाना र कोशी प्रदेशका स्वास्थ्य मन्त्री इन्द्रमणी पराजुलीले हस्ताक्षर गरेका छन् । यस्तै, साक्षीका रूपमा जग्गादाता प्रतिनिधिका तर्फबाट अर्जुनकुमार गौतम र शारदा प्रसाद गौतम तथा मन्त्रालयका तर्फबाट प्रदेश सचिव डा. कीर्तिपाल सुवेदीले हस्ताक्षर गरेका छन् ।
प्राविधिक टोली सहित अस्पताल निर्माण प्रयोजनका लागि दान भएको जग्गाको निरीक्षण प्रक्रिया तत्काल अगाडि बढाउने, हाल सामाजिक विकास मन्त्रालयको नाममा रहेको १६७ रोपनी जग्गा स्वास्थ्य मन्त्रालयको नाममा सार्न आवश्यक प्रक्रिया अघि बढाउने, अस्पताल निर्माणका लागि वातावरणीय परीक्षण गर्न २०८३ साल मंसिर महिनाभित्र आवश्यक स्रोत व्यवस्थापन गर्ने र चालु आर्थिक वर्षभित्र प्रतिवेदन तयार गर्ने, बुँदा नं. १ र ३ कार्यान्वयनको प्रतिवेदन तयार भएपछि सोही आधारमा आगामी बजेट तथा कार्यक्रममा अस्पताल निर्माणका लागि स्रोत सुनिश्चित गर्ने र हाल अनशनरत प्रतिनिधिहरूले अनशन स्थगित गर्ने सहमति भएको छ ।
ओखलढुङ्गा, सोलुखुम्बु, खोटाङ र पश्चिम उदयपुर क्षेत्रका नागरिकको स्वास्थ्य उपचार तथा राजमार्गमा हुने आपतकालीन स्वास्थ्य समस्यालाई सम्बोधन गर्ने उद्देश्यले २०७६ पुस २८ गते टोक्सेलमा प्रादेशिक अस्पताल बनाउने निर्णय भएको थियो । सोही अनुरूप स्थानीय समाजसेवी तथा जग्गादाताहरूले २०७७ पुस ८ गते १६७ रोपनी जग्गा निःशुल्क रूपमा तत्कालीन सामाजिक विकास मन्त्रालयको नाममा नामसारी गरिदिएका थिए । सन् २०२१ मा १५० शय्याको अस्पताल निर्माणका लागि लागत इस्टिमेट र विस्तृत परियोजना प्रतिवेदन (डीपीआर) तयार भई जग्गा सम्याउने काम समेत भएको थियो ।
तर, त्यसपछिको ६ वर्षसम्म अस्पताल निर्माणको काम अगाडि नबढेको भन्दै सङ्घर्ष समितिले गत कात्तिक १७ गते स्वास्थ्य मन्त्री पराजुलीलाई आमरण अनशनसहितको मागपत्र पेस गरेको थियो । मंगलबारको सहमतिसँगै वर्षौंदेखि अलपत्र परेको अस्पताल निर्माणको कामले गति लिने अपेक्षा स्थानीयले गरेका छन् ।










Discussion about this post