मंसिर ६, सोलुखुम्बु । हिउँदको चिसो बढ्दै गएसँगै सगरमाथा क्षेत्र (खुम्बु)बाट बाहिरिने पर्यटकको सङ्ख्या बढेको छ। पछिल्लो एक साताको तथ्याङ्कले खुम्बु क्षेत्रमा प्रवेश गर्नेभन्दा बाहिरिने पर्यटकको सङ्ख्या दोब्बरभन्दा बढी देखाएको छ। जिल्ला प्रहरी कार्यालय सोलुखुम्बुले उपलब्ध गराएको साप्ताहिक विवरणअनुसार पछिल्लो सात दिनमा हवाई मार्गमार्फत खुम्बु क्षेत्रबाट १ हजार १८० पर्यटक बाहिरिएका छन् भने ५२९ पर्यटक प्रवेश गरेका छन्।
प्रवेश गर्नेको तुलनामा बाहिरिने पर्यटकको सङ्ख्या ६५१ ले बढी रहेको छ। बाहिरिने पर्यटकमध्ये ८७७ विदेशी र ३०३ नेपाली रहेका छन्। यसै अवधिमा खुम्बु क्षेत्रमा ३७४ विदेशी र १५५ नेपाली पर्यटक प्रवेश गरेको जिल्ला प्रहरी कार्यालयका सूचना अधिकारी प्रहरी निरीक्षक मौसम तामाङले जानकारी दिनुभयो।
तथ्याङ्कअनुसार खुम्बु क्षेत्रबाट बाहिरिने विदेशी पर्यटकमध्ये ३२७ महिला र ५५० पुरुष रहेका छन्। नेपाली पर्यटकतर्फ ४६ महिला र २५७ पुरुष बाहिरिएका छन्। यस्तै, प्रवेश गर्ने विदेशी पर्यटकमा १०२ महिला र २७२ पुरुष तथा नेपाली पर्यटकमा ५४ महिला र १०१ पुरुष रहेका छन्।
हिमाली क्षेत्रमा तापक्रम घट्दै जानु र शरद् पर्यटनको मुख्य समय क्रमशः सकिँदै जानुले पर्यटकको आवागमनमा यस्तो अन्तर देखिएको हो। पछिल्लो तथ्याङ्कले सगरमाथा क्षेत्रको पर्यटन गतिविधि विस्तारै मौसमी चक्रअनुसार सुस्ताउँदै गएको सङ्केत गरेको छ।










Discussion about this post